लगानी बोर्डद्वारा ९७ अर्बको लगानी स्वीकृत, पश्चिम सेतीसहित ४ परियाेजना अघि बढाइने

काठमाडौं । लगानी बोर्डले करिब ९७ अर्बको वैदेशिक लगानी स्वीकृत गरेको छ । प्रधानमन्त्री एवं लगानी बोर्डका अध्यक्ष केपी शर्मा ओलीको अध्यक्षतामा मंगबार बसेको बोर्डको ४७औं बैठकले उक्त लगानी स्वीकृत गरेको हो ।

प्रधानमन्त्री निवास बालुवाटारमा सम्पन्न उक्त बैठकले ५४ करोड अमेरिकी डलर लागत अनुमान रहेको २८५ मेगावाटको माथिल्लो तमोर जलविद्युत परियोजनामा लागनी स्वीकृत गरेको छ । त्यस्तै, ३३ अर्ब ४१ करोड ४० लाख लागत अनुमान रहेको १३९.२ मेगावाटको तल्लो मनाङ्ग मर्स्याङ्गदी जलविद्युत परियोजनाको लगानी स्वीकृत गरेको हो ।

यी दुई जलविद्युत् आयोजनाबाहेक बैंकले सार्वजनिक–निजी साझेदारी (पिपिपी) अवधारणामा झापाको दमकमा निर्माण हुने गरी प्रस्ताव गरिएको देशकै ठूलो औद्योगिक पार्कको विस्तृत परियोजना प्रतिवेदन (डिपिआर) स्वीकृत गरी विकासकर्तासँग परियोजना विकास सम्झौता ९पिडिए) का लागि आवश्यक तयारी गर्न बोर्डको कार्यालयलाई निर्देशन दिएको छ ।

बैठकले संखुवासभामा निर्माण हुने ६७९ मेगावाटको तल्लो अरुण जलविद्युत परियोजनाको विस्तृत सम्भाव्यता अध्ययनको लागि सर्वेक्षण अनुमति पत्र जारी गर्न परियोजना विकासकर्ता एसजेभीएन लिमिटेड इन्डियासँग गरिने समझदारी पत्रको मस्यौदा स्वीकृत गरेको छ ।

त्यसैगरी, बैठकमा ७५६ मेगावाटको तमोर जलाशययूक्त जलविद्युत परियोजनाको सर्वेक्षण अनुमति प्रदान गर्ने सम्बन्धमा देखिएका अस्पष्टतालाई सम्बोधन गरी आवश्यक कानूनी सुधार गर्न ऊर्जा, जलश्रोत तथा सिंचाई मन्त्रालयलाई निर्देशन दिने निर्णय गरेको छ ।

बैठकले पश्चिम सेती र एसआर–६ संयुक्त जलविद्युत परियोजनाको विकास तथा लगानीको खाका तयार गर्न अध्ययन गरी बोर्ड समक्ष सिफारिस गर्न राष्ट्रिय योजना आयोगका उपाध्यक्षको संयोजकत्वमा एक समिति गठन गरेको छ । यसैगरी, बैठकले अरुण ३ जलविद्युत परियोजना प्रवेश मार्ग अन्तर्गत छ्याङ्कुटी–दिदिङ खण्डमा पर्ने जग्गाको मुआब्जा उपलब्ध गराउने आवश्यक प्रक्रिया अगाडि बढाउन लगानी बोर्डको कार्यालयलाई निर्देशन दिएको छ ।

लगानी बोर्डको संस्थागत सुधार एवं कार्य प्रणाली व्यवस्थित गर्ने सम्बन्धमा ‘विदेशी मुद्रा सटही एवं स्थानान्तरण सुविधा सिफारिस सम्बन्धी कार्यविधि,२०७८’ स्वीकृत भएको छ ।

बैठकमा प्रधानमन्त्री ओलीले ऊर्जा सम्बन्धी परियोजनाको विकास गर्दा ऊर्जाको उत्पादन सँगसगै प्रसारण प्रणाली समेतको निर्माण कार्य अगाडि बढाई परियोजनाको प्रभावकारी कार्यान्वयनमा आवश्यक समन्वय तथा सहजीकरण गर्न सम्बन्धित निकायलाई निर्देशन दिए । त्यसैगरी उनले उत्पादित ऊर्जाको स्वदेशमै खपत बढाउन औद्योगिक विकासलाई तीव्रता दिन सम्बन्धित निकायको ध्यानाकर्षण गराए ।
बैठकमा उपप्रधान तथा अर्थमन्त्री एवं बोर्डका उपाध्यक्ष विष्णु पौडेलले लगानी बोर्डमा पेश गरिएका प्रस्ताव मुलुकको आर्थिक विकासमा टेवा पुर्याउने देखिएको बताउँदै बोर्डका निर्णयको प्रभावकारी कार्यान्वयमा ध्यान पुर्याउनु पर्नेमा जोड दिए ।

बैठकमा ऊर्जा, जलस्रोत तथा सिंचाई मन्त्री शरतसिंह भण्डारी, माननीय उद्योग, वाणिज्य तथा आपूर्ति मन्त्री राजकिशोर यादव, माननीय भौतिक पूर्वाधार तथा यातायात मन्त्री बसन्त कुमार नेम्बाङ् , माननीय वन तथा वातावरण मन्त्री नारदमुनि राना, राष्ट्रिय योजना आयोगका उपाध्यक्ष डा. पुष्प राज कँडेल, नेपाल सरकारका मुख्य सचिव शंकरदास बैरागी, नेपाल राष्ट्र बैंकका गभर्नर महाप्रसाद अधिकारी, बोर्डका विज्ञ सदस्य हरिभक्त शर्मा, भवानी राणा, राजेशकाजी श्रेष्ठ, आमन्त्रित सदस्य बालकृष्ण शिवाकोटी लगायत नेपाल सरकारका उच्च पदस्थ अधिकारीको उपस्थिति थियो ।