व्यवसायीले चीनबाट ल्याउने १० हजार अक्सिजन सिलिन्डरमध्ये २५ सय वटा सोमबार काठमाडौं आइपुग्ने
कागजात नहेरी सिलिन्डर कसले ल्याएको भन्न सकिन्न: भन्सार कार्यालय
काठमाडौं । चीनबाट नेपाली व्यवसायीले आयात गरेका अक्सिजन सिलिन्डर सोमबारबाट काठमाडौंमा आइपुग्ने भएका छन् । पहिलो चरणमा १० हजार थान सिलिन्डर ल्याउन लागेको ढुवानीकर्ता (लजिस्टिक) कम्पनी सिल्क ट्रान्सपोर्टका अध्यक्ष रमेश शेर्पाले मकालु खबरलाई जानकारी दिए । ‘काठमाडौंमा सोमबारबाट अन्सिजन सिलिन्डर झर्न शुरु हुन्छ, तातोपानी नाकामा आइपुग्न लागेको २ हजार ५ सय थान सिलिन्डर सोमबार काठमाडौंमा झर्छ,’ अध्यक्ष शेर्पाले भने— ‘बाँकी ७ हजार ५ सय थान सिलिन्डर पनि खासामा लोड गर्दै राखिएको छ ।’
एक साताभित्रै १० हजार थान नै सिलिन्डर नेपाल आइसक्ने उनको भनाइ छ । तर, हाल ल्याउन लागिएको सिलिन्डर चीनले नेपाल सरकारलाई अनुदानमा दिएको सिलिन्डर नभएकोले भ्रममा नपर्न उनले आग्रह गरे । ‘सरकारी अनुदानको सिलिन्डर अहिलेसम्म आएको छैन,’ उनले भने, ‘यो व्यवसायीले ल्याउन लागेको सिलिन्डर हो, पहिलो खेपमा १० हजार थान ल्याउन लागिएको छ र आवश्यकता अनुसार ल्याउने क्रम जारी नै रहन्छ ।’
यसअघि समाचार संस्था राससले चीन सरकारले दिएका १८ हजार थान सिलिन्डर तातोपानीमा आइसकेको समाचार प्रकाशित भएकाे थियो । तातोपानी भन्सार कार्यालयका प्रमुख नारद गौतमले पनि अहिले २ हजार ५ सय थान सिलिन्डर आइतबार भन्सार नाकामा आइपुग्ने जानकारी पाएको बताए ।
तर, सिलिन्डर कुन व्यावसायिक कम्पनीले आयात गरेको हो भन्ने कुरा सिलिन्डर आएपछि कागजात हेरेर मात्र भन्न सकिने उनको भनाइ छ । ‘सिलिन्डर आउँदै छ भन्ने सुनेर हामी उच्च प्रतिक्षामा छौं,’ मकालु खबरसँग उनले भने, ‘नाकामा सिलिन्डर आएको १ घण्टाभित्रै जाँचपास गरेर सही देखिए काठमाडौंतर्फ पठाइहाल्ने हाम्रो तयारी छ । बाटोको अवस्था पनि राम्रो छ भन्ने जानकारी पाएका छौं । तर, सिलिन्डर कसले ल्याउन लागेको हो भन्ने चाहिँ कागजात हेरेपछि मात्रै थाहा हुन्छ ।’
अहिले नेपाल आउन शुरु भएका सिलिन्डर ४० र ५० केजी तौलका रहेका र एउटा कन्टेनरले १० टनभन्दा बढी नबोक्ने भएकाले १ हप्तामा मात्र ढुवानी सकिने अध्यक्ष शेर्पाले बताए ।
आयातकर्ता कम्पनी र मूल्यबारे भने उनले कुरा गर्न चाहेनन् । ‘हामीले धेरै जनाको सामान ल्याइदिने काम गर्छौं,’ उनले भने, ‘आफ्नो नाम र मूल्य खोल्ने वा गोप्य राख्ने आयातकर्ता कम्पनीको इच्छाको कुरा हो हामीले भन्न मिल्दैन ।’
आफ्नो नाम र मूल्य खोल्ने वा गोप्य राख्ने आयातकर्ता कम्पनीको इच्छाको कुरा हो