मकालु खबर
ताजा, शुलभ, निष्पक्ष

उपत्यकामा दुई हजार बढी चालक कारबाहीमा

काठमाडौं । महानगरीय ट्राफिक प्रहरी महाशाखाले सवारी जाँचका क्रममा नियम उल्लंघन गर्ने दुई हजार बढी चालकलाई कारबाही गरेको छ ।

होलीको अवसरमा उपत्यकाको विभिन ९० भन्दा बढी स्थानमा गरेको सवारी चाँचका क्रममा उनीहरूलाई यसरी कारबाही गरेको महाशाखाले जनाएको छ । सो क्रममा महाशाखाबाट ९०० बढी ट्राफिक प्रहरी खटाएको जनाइएको छ ।

ट्राफिक व्यवस्थापनको योजना तयार गरी होलीमा हुन सक्ने सम्भावित दुर्घटनाको जोखिमलाई मध्यनजर गर्दै सुरक्षा कडा पारी जाँच गरिएको महाशाखाका प्रमुख जनक भट्टराईले जानकारी दिए ।

होली मनाउन उच्छृंखल तरिकाले सवारी-साधनको प्रयोग गर्ने, तीव्र गति र जिकज्याक गरी मोटरसाइकल चलाउने, मादकपदार्थ सेवन गरी हुइँक्याउने, तीनजना चढ्ने, हेल्मेट नलगाउनेजस्ता गतिविधिमा संलग्न चालकउपर निगरानी बढाई कारबाही गरिएको उनले बताए ।

महाशाखाले आइतबार मादकपदार्थ सेवन गरी सवारी चलाउने ५४ जनालाई कारबाही गरेको छ । विनाहेल्मेट र तीनजना चढ्ने, लापरबाही तरिकाले सवारी चलाउनेलगायतका सवारी नियम उल्लंघन गर्ने एक हजार ६०९ सवारी चालकलाई कारबाही गरिएको र होहल्ला गरी सवारी चलाउने, जबर्जस्ती रङ दल्न खोज्ने, कागजपत्र साथमा नहुने, लापरबाही तरिकाले सवारी चलाउने १३ वटा चारपांग्रे र ४६८ वटा दुईपांग्रे सवारी-साधन होल्ड गरी कारबाही गरिएको महाशाखाले जनाएको छ ।

उपत्यकाका तीन जिल्लामा आज २१ वटा सामान्य दुर्घटनाहरू भएको महाशाखाले जनाएको छ । रासस

प्रतिकृयाहरु
Loading...
Makalukhabar.com