आईओएफटीसीको आठ लाख सहयोग

काठमाडौँ । अमेरिकाको पोर्टल्यान्डमा मुख्यालय रहेको गैर नाफामूलक संस्था अन्तर्राष्ट्रिय खुला मैत्री तेक्वान्दो च्याम्पियनसिप (आईओएफटीसी) ले कोरोना भाइरस (कोभिड– १९) का कारण समस्यामा परेका तेक्वान्दो खेलाडीलाई राहत उपलब्ध गराउन आर्थिक सहयोग प्रदान गरेको छ ।

काठमाडौँ उपत्यकासहित सातै प्रदेशमा समस्यामा परेका तेक्वान्दो खेलाडीको पहिचान गरी राहत उपलब्ध गराउने गरी आईओएफटीसीले ८ लाख रुपैयाँ अमेरिकाबाट पठाएको हो । समस्यामा परेका खेलाडीको पहिचान गर्न रामचन्द्र व्यञ्जनकारको संयोजकत्वमा ४ सदस्यीय आईओएफटीसी हेल्प डेस्क टिम नेपाल गठन गरिएको छ । सदस्यमा रजिन सिंह, अर्जुन महर्जन र निरोज गौतम रहेका छन् । सल्लाहकारमा मैत्री तेक्वान्दो डोजाङका प्रमुख अष्टबहादुर महर्जन छन् ।

युवा तथा खेलकुद मन्त्री जगबहादुर सुनार (विश्वकर्मा) ले टिमका संयोजक व्यञ्जनकारलाई सिंहदरबारमा आइतबार चेक हस्तान्तरण गरे । सो अवसरमा मन्त्री विश्वकर्माले आईओएफटीसीले गरेको सहयोगले केही हदसम्म भए पनि खेलाडीलाई सहयोग पुग्ने विश्वास व्यक्त गरे ।

आईओएफटीसीले २०७२ सालको विनाशकारी भूकम्पकाबाट पीडितलाई पनि सहयोग गरेको थियो । आईओएफटीसीका संस्थापक एवं निर्देशक दिवाकर महर्जनले कोभिड– १९ को समस्या विश्वव्यापी भएकाले ठुलो मात्रामा सहयोग गर्न नसकिएको बताउँदै थोरै भए पनि यसले खेलाडीलाई राहत पुगोस् भन्ने उद्देश्यले सहयोग उपलब्ध गराएको बताए ।