कोरोना आशंकामा आइसोलेसनमा उपचाररत सिन्धुपाल्चोकका चारैजनाको रिपोर्ट नेगेटिभ

चैत्र २६, काठमाडौं । कोरोना आशंकामा प्राथमिक स्वास्थ केन्द्र बाह्रबीसे र जिल्ला अस्पताल चौतारामा आइसोलेसनमा उपचाररत चारैजना बिरामीको रिपोर्ट नेगेटिभ आएको छ ।  

उनीहरुको स्वाब परीक्षणपछि आज प्राप्त रिपोर्ट सार्वजनिक गर्दै जिल्ला अस्पताल चौतारा र प्राथमिक स्वास्थ केन्द्र वाह्रबीसेले उनीहरुमा कोरोना नदेखिएको पुष्टि गरेको हो ।  

विदेशबाट फर्किएकी बाह्रबीसे–७ की रेणु विक, सुष्मा विक र बाह्रबीसे–३ का रोशन शेर्पा कोरोना संक्रमणको आशंकामा प्राथमिक स्वास्थ केन्द्र बाह्रबीसेको आइसोलेसनमा उपचारत थिए ।  

त्यस्तै लिसङ्खुपाखर–७ की सुनमाया तामाङ पनि कोरोना संक्रमणको आशंकामा चौतारा अस्पतालको आइसोलेसनमा थिइन्। उनीहरु कसैमा पनि कोरोना संक्रमण नभएको स्वास्थ्य कार्यालयका वरिष्ठ जनस्वास्थ्य अधिकृत दुर्गादत्त चापागाईंले जानकारी दिए।