अनलाइन सपिङ कम्पनी दराजलाई तीन लाख जरिवाना

माघ २०, काठमाडौँ । अनुचित व्यापारिक तथा व्यवसायजन्य क्रियाकलाप गरेको भन्दै वाणिज्य, आपूर्ति तथा उपभोक्ता संरक्षण विभागले अनलाइन सपिङ कम्पनी दराज क्यामुलाई ३ लाख रुपैयाँ जरिवाना गरेको छ । विभागले दराजलाई सोमबार तीन लाख जरिवाना गर्ने निर्णय गरेको महानिर्देशक नेत्रप्रसाद सुवेदीले जानकारी दिएका छन् । 

दराजले गरिरहेको व्यवसायको वैधताबारे विभागले गत मङ्सिरबाट नै अध्ययन गरिरहेको थियो। कार्गोको अनुमति पाएको कम्पनीले अनलाइन व्यापार गरेको र ग्राहकलाई ठगेको भेटाएपछि विभागले जरिवाना गरेको हो । 

बजार अनुगमनका क्रममा दराज कम्पनीले वस्तु वा सेवाको वास्तविक गुणस्तर, परिमाण, मूल्य, नापतौल, ढाँचा वा बनावट आदि ढाँटी, लुकाई, छिपाई वा झुक्क्याई त्यस्तो वस्तु वा सेवा बिक्री वा प्रदान गरेको, वस्तुको कृत्रिम अभाव सृजना, जम्माखोरी गर्ने वा बिक्री गर्ने गरेको, त्रुटिपूर्ण उत्पादनबाट नष्ट भएको वस्तुको मूल्य वा व्यापारिक कारोबारको सिलसिलामा करार भएको वस्तुको मूल्य समेत अन्य वस्तुको लागत मूल्यमा समावेश गरी बिक्री गर्ने गरेको र उपभोग गरिसक्नु पर्ने अवधि व्यथित भइसकेको उपभोग्य वस्तु वा उपभोग गर्न नमिल्ने वस्तुमा नयाँ लेबल लगाई त्यस्तो वस्तु बिक्री गर्ने गरेको देखिएको विभागको दाबी छ । 

null

विसं २०७३ फागुन १४ गते कम्पनी रजिस्टारको कार्यालयमा क्यामु दराज कम्पनी प्रालि नाममा दर्ता भएको कम्पनीले अनलाइन विज्ञापन, सफ्टवेयर विकास र कार्गो उद्योग संचालन गर्ने उल्लेख छ ।   

विश्व प्रसिद्ध चिनियाँ अनलाइन कम्पनी अलिबाबासँगको सहकार्य र विदेशी लगानीसमेत भित्र्याएको उक्त कम्पनी वाणिज्य, आपूर्ति तथा उपभोक्ता संरक्षण विभागमा दर्ता नभएको विभागले जनाएको छ ।