सवारी दुर्घटनामा परी दुईको मृत्यु
माघ २४, महोत्तरी । महोत्तरी र कञ्चनपुर गरी दुई फरक–फरक जिल्लामा सवारी दुर्घटनामा परी दुई जनाको मृत्यु भएको छ ।
महोत्तरीमा ज.१ ख ७५८ नम्बरको बसले ज.७ प ८५४५ नम्बरको मोटरसाइकलाई ठक्कर दिँदा एकको मृत्यु भएको छ ।
महोत्तरीको पिपरा गाउँपालिका ५ सहोडवास्थित सडकमा बिहीबार दिउँसो उक्त बसले सो मोटरसाइकललाई ठक्कर दिँदा पिपरा गाउँपालिका ५ बस्ने १७ वर्षीय मोटरसाइकल चालक राजेन्द्र शर्माको मृत्यु भएको प्रहरीले जनाएको छ ।
प्रहरीका अनुसार उनलाई ठक्कर दिने बस चालक हाल फरार रहेका छन् । फरार बस चालकको खोजीकार्य हुनुका साथै घटनाबारे अनुसन्धान भईरहेको प्रहरीले जनाएको छ ।
त्यसैगरी कञ्चनपुरमा पनी मोटरसाइकलको ठक्करबाट एक बृद्ध पैदलयात्रीको मृत्यु भएको छ ।
कञ्चनपुरको भिमदत्त नगरपालिका -१९ बागफाँटास्थित सडकमा पनि म.२ प ७३५८ नम्बरको मोटरसाइकलको ठक्करबाट गम्भीर घाइते भएकी पैदलयात्री ८० वर्षीया तुलसी देवी चन्दको महाकाली अस्पतालमा उपचारको क्रममा बिहीबार साँझ मृत्यु भएको छ ।
मोटरसाइकल र चालकलाई प्रहरीले नियन्त्रणमा लिएको छ ।