हिमालय एयरलाइन्सले रद्द गर्याे चिनियाँ उडान
मकालु खबर
माघ १७, काठमाडौं । चीनमा फैलिएको कोरोना भाइरसको संक्रमणलाई मध्येनजर गर्दै हिमालय एयरलाइन्सले आफ्नो चीनतर्फको सबै उडान रद्द गर्ने भएको छ ।
चीनमा कोरोना भाइरसको प्रभाव बढ्दै गएपछि एयरलाइन्सले चीनतर्फको आफ्नो पाँचवटै उडान रद्द गर्न लागेको हो ।
चीनमा कोरोना भाइरसको संक्रमण बढेपछि एयरलाइन्सले १० माघमा नै तीन वटा प्रमुख सहरको उडान रद्द गरिसकेको छ ।
चीनमा कोरोना भाइरसको संक्रमण नरोकिएपछि एयरलाइन्सले चोङचिङ र बेइजिङ सहरका लागि पनि उडान र अवतरण रद्द गर्नुपरेको एयरलाइन्सका ब्रान्ड एण्ड सर्भिस इम्प्रुभमेन्ट विभागका प्रमुख दलीले बताइन् ।
एयरलाइन्सले फेबु्रअरी ७ मा अन्तिम उडान गर्नेछ । हिमालयले फेब्रुअरी ६ मा बेइजिङ र ७ फेबु्रअरीमा चोङचिङ अन्तिम उडान गर्नेछ ।
त्यसपछि अनिश्चित समयसम्मका लागि चीन उडान नहुने एयरलाइन्सकी ब्रान्ड विभाग प्रमुख उज्योला दलीले बताइन् ।
हिमालयले चोङचिङ माघ ९ गतेदेखि मात्रै उडान सुरु गरेको थियो ।
कोरोना भाइरसकै कारण नेपालमा आउने चिनियाँ नागरिकको संख्यामा पनि कमी आएको छ । चीनमा हालसम्म कोरोनाका कारण २१३ जनाको मृत्यु भइसकेको छ । कोरोनाको संक्रमण अन्य १८ देशमा पनि फैलिसकेको छ ।
मकालु खबर
