भाले, अण्डा र घ्यू बोकेर सुत्केरीको घरमा गाउँपालिका अध्यक्ष, भैँसीलाई पनि सुत्केरी खर्च

 

साउन ५, पर्वत । पर्वतको एक गाउँपालिकाले आर्थिक वर्ष सुरु भएको एक साता पनि नबित्दै गाउँसभामा नीति तथा कार्यक्रम पारित गरिएको निर्णय कार्यान्वयन सुरु गरेको छ । 

पर्वतको महाशिला गाउँपालिकाले सुत्केरी महिला भेट्नका लागि ‘अध्यक्ष कोशेली कार्यक्रम’ आर्थिक वर्षको सुरुवातबाटै सुत्केरी भएका महिलाका घर–घरमा पुगेर कोशेली वितरण सुरु गरेको हो । 

null

गाउँपालिका अध्यक्ष राजु पौडेलले शुक्रबार पहिलोपटक महाशिला–५, लुङ्खु आहाले निवासी सुत्केरी गुडिया सुनारसँग भेटघाट गरेका हुन् । 

अध्यक्ष पौडेल, उपाध्यक्ष हीरादेवी राना, स्वास्थ्यकर्मी र वडाध्यक्षहरुको उपस्थितिमा सुत्केरी आमालाई कुखुराको भाले, घ्यू र अन्डा वितरण साथै स्वास्थ्यकर्मीबाट सुत्केरीको स्वास्थ्य जाँच पनि गरिएको महाशिला गाउँपालिकाका प्रवक्ता जीवनविक्रम उच्चैले जानकारी दिए । 

स्वास्थ्य जाँचका क्रममा आमा र बच्चाको अवस्था सामान्य रहेको थियो। स्वास्थ्य संस्थामा पुगेर सुरक्षित ढङ्गबाट सुत्केरी गराउने कामलाई प्रोत्साहित गर्न घर(घरमै पुगेर सुत्केरी भेट्न ‘अध्यक्ष कोशेली कार्यक्रम’ सुरु गरिएको हो। 

महाशिला गाउँपालिकाका ६ वटै वडामा सुरक्षित सुत्केरी गराउन बर्थिङ सेन्टर स्थापना गरिएका छन्। ‘हरेक महिला स्वास्थ्य संस्थामै पुगेर सुत्केरी गराउने काम भएका कारण जिरो होम डेलिभरीको अवस्था छ,’ अध्यक्ष पौडेलले भने, ‘अब घरमा सुत्केरी गराउने मानसिकता नै नबसोस् भनेर प्रोत्साहनको कार्यक्रम ल्याएका हौँ ।’ 

यसैगरी महाशिलाले स्वास्थ्य संस्थामा सुत्केरी हुने महिलालाई मात्रै होइन, पाडापाडी हुर्काउने कृषकलाई समेत प्रोत्साहन गर्न भैँसीलाई सुत्केरी भत्ता दिने निर्णय गरेको छ । भैँसी ब्याएपछि पाडापाडी काटेर खाने चलन हटाउन पाडापाडी हुर्काउने कृषकलाई ५ सय रुपैयाँ भत्ता दिने निर्णय भएको गाउँपालिका अध्यक्ष पौडेलले बताए । 

स्थानीय जातका लिमे र पाराकोटे जातका भैँसीका पाडापाडी काटेर खानेलाई १ हजार रुपैयाँ जरिवाना तिराउने निर्णय गत वर्षदेखि नै कार्यान्वयनमा छ । 

महाशिला गाउँपालिकाले यसअघि ‘एक घर एक रोजगार’, रक्सी नियन्त्रण, बाँदर नियन्त्रण अभियान सञ्चालन गरेका कारण देशभर चर्चामा रहेको छ । –रासस 

प्रतिक्रिया

Leave a Reply

Your email address will not be published. Required fields are marked *