सगरमाथाको उचाई नापेर फर्कियो सरकारी टोली
जेठ १०, काठमाडौं । सर्वोच्च शिखर सगरमाथाको उचाई नाप्ने सरकारी टोली फर्किएको छ ।
सगरमाथाको उचाई नाप्ने टोलीका प्रमुख नापी अधिकृत खिमलाल गौतमसहित नापी अधिकृत रविन कार्की, सर्भेयर सुरजसिंह भण्डारी र अमिन युवराज धिताल बिहीबार काठमाडौं फर्किएका हुन् ।
null
सो टोलीलाई शुक्रबार भूमि व्यवस्था, सहकारी तथा गरिवी निवारणमन्त्री पद्ममा अर्यालले सिंहदरबारस्थित मन्त्रालयमै एक कार्यक्रमको आयोजना गरी स्वागत गरेकी छन् ।
सगरमाथाको उचाई नाप्ने टोली बुधबार (जेठ ८ गते) अत्याधुनिक उपकरणसहित चुचुरोमा पुगेको थियो । टोलीले हिउँ सतह र चट्टानी सतह दुवैका उचाइ मापन गरेको छ । तर तत्कालै सगरमाथाको उचाइ पत्ता लाग्दैन । सबै प्रक्रिया टुंग्याएर डाटा प्रोसेसिङ गरि उचाइ निकाल्न अझै कम्तीमा ६ महिना लाग्ने जानकारी दिइएको छ ।
नेपालले पहिलो पटक आफैं सगरमाथाको उचाइ नाप्ने लागेको हो । भूकम्पका कारण सगरमाथाको उचाइ घटेको हो कि भन्ने अनुमानका कारण उचाई नाप्न लागिएको हो ।
यसअघि भारत, अमेरिका र चीनले नाप्दा फरक/फरक तथ्यांक आएको थियो ।
सन् १९५४ मा भारतीय नापी विभागको टोलीले र १९९९ मा अमेरिकी टोलीले सगरमाथाको उचाइ नापेका थिए । भारतीय टोलीले ८,८४८ र अमेरिकी टोलीले ८,८५० मिटर अग्लो सगरमाथा रहेको निष्कर्ष निकालेका थिए ।
यद्यपी नेपालले अहिलेसम्म ८,८४८ मिटरलाई नै मान्यता दिँदै आएको छ ।