सरकारलाई राजपाको चेतावनीः ‘जब सरकारले सुन्दैन संसद–सडक गरम हुनेछ’

“

धनगढी, असोज ४ । राष्ट्रिय जनता पार्टीका नेता राजेन्द्र महतोले देशभर भ्रष्टाचार, हत्या, हिंसा, बलात्कार लगायतका घटना बढीरहेपनि सरकार हात बाँधेर बसेको आरोप लगाएका छन् । बिहिबार धनगढीमा पत्रकारसँग कुराकानीका क्रममा उनले सरकारले आम जनतालाई सुरक्षाको अनुभुति नै गराउन नसकेको तथा सरकार हात बाँधेर बसेको आरोप लगाएका हुन् ।

‘भ्रष्टाचार, हत्या, हिंसा, बलात्कारका घटना दिनप्रतिदिन बढीरहेका छन्, सरकार अलमलमा फसेको छ,’ महतोले भने, ‘न आम जनतालाई सरकारको अनुभुति गराउन सकेको छ, न त प्रदेश सरकार राम्ररी सञ्चालन भएका छन्,।’

साथै राजपाका नेता महतोले तीन वर्षदेखि पटक–पटक संविधान संशोधन गर्ने आश्वासन पाए पनि पुरा नभएको भन्दै सरकारलाई संविधान संशोधन गर्न आग्रह गरे । उनले थरुहट तथा मधेश आन्दोलन स्थिर मात्रै भएको समाप्त नभएको बताए । राजपा अहिले धैर्यताका साथ बसेको भन्दै उनले सरकारलाई धैर्यताको बाँध टुटेपछि नियन्त्रण गर्न गाह्रो हुने चेतावनी समेत दिए ।

उनले राजपाले वर्तमान सरकारले मधेश तथा थारूहरूको माग सम्बोधन गर्छ भन्ने आशाले अहिले समर्थन गरिरहेको बताए । ‘सरकारले इमान्दारिता देखायो भने संविधान संशोधन गर्न कुनै समस्या छैन,’ उनले भने, ‘अहिले संसदमा पनि हामी नरम भएका छौँ। जब सरकारले सुन्दैन संसद पनि गरम हुन्छ र त्यस्तै अवस्था आए सडक पनि गरम हुनेछ।’

उनले तीन वर्षदेखि पटक–पटक संविधान संशोधन गर्ने आश्वासन पाए पनि पुरा नभएको बताए। महतोले भने, ‘ मधेशी, थारु, दलित, आदिबासी, मुस्लिमका अधिकार समेट्ने गरी संविधान संशोधन गर्ने, टीकापुर हत्याकाण्डको आरोपमा पक्राउ परेका अभियूक्तलाई रिहाइ गर्ने लगायतका विषयमा तीन वर्षदेखि आश्वासन पाइरहेका छौं। तर कुनै पनि आश्वासन पूरा भएका छैनन्।’

“