न्याम्सको उपकुलपतिमा कसलाई छान्लान् उपेन्द्रले ? यी हुन् २२ दाबेदार

“

काठमाडौं, भदौ १२ । चिकित्सा विज्ञान राष्ट्रिय प्रतिष्ठान (न्याम्स) को उपकुलपतिका लागि २२ जनाले आवेदन दिएका छन् । स्वास्थ्य तथा जनसंख्या मन्त्रालयले आवेदन मागेपछि निवर्तमान उपकुलपति डा. गणेश गुरुङसहित २२ जनाले आवेदन दिएका हुन् ।

दोहोर्‍याएर आवेदन दिएका गुरुङले आफू पनि योग्य भएकाले आवेदन दिएको बताए । उनले भने, ‘मैले सुरु गरेका धेरै योजनाहरु अधुरै छन् । म भएँ भने मेरो योजना अनुसार काम गर्छु बुझेको छु । अरु भए पनि नराम्रो त भन्दिन तर उनीहरुलाई बुझ्न समय लाग्छ र योजना अनुसार काम नहुन सक्छ ।’

सबैले इच्छा राख्न सक्ने भएकाले क्राइटएरिया पुगेकाले आवेदन दिन सक्ने भएकाले प्रतिस्पर्धी धेरै हुँदा अन्यथा लिन नहुने गुरुङको भनाई छ । आफूले जग्गा जमिन ल्याएर विश्व विद्यालय बनाउन काम अगाडी बढाएको र निर्माणका अधुरा काम सक्नका लागि आवेदन दिएको उनको भनाई छ ।

आफूले राम्रो काम गरेपनि केही व्यक्तिले स्वार्थ राखेर विवादमा तान्न खोजेको गुनासो गरेका छन् । आफूले प्रस्ट रुपमा योजना सार्बजानिक गरेकाले त्यो अनुसार काम गर्ने अवसर नदिए पनि गुनासो नरहने गुरुङले बताए ।

उपकुलपति छनोटका लागि स्वास्थ्य तथा जनसंख्यामन्त्री उपेन्द्र यादवको संयोजकत्वमा तीन सदस्यीय समिति बनेको छ । समितिमा मन्त्रालयका प्रमुख विशेषज्ञ डा. सुशिलनाथ प्याकुरेल र नेपाल मेडिकल काउन्सिलका अध्यक्ष डा. धर्मकान्त बास्कोटा सदस्य रहेका छन् ।

समितिले छनोट गरेका नामका आधारमा प्रतिष्ठानको सहकुलपति समेत रहेका मन्त्री यादवले उपकुलपति नियुक्तीका लागि कुलपति तथा प्रधानमन्त्रीलाई सिफारिस गर्नेछन् । सोही आधारमा प्रधामनमन्त्रीले उपकुलपति नियुक्त गर्नेछन् ।