बिमस्टेक तयारीः तीन दिन सडकमा जोर–बिजोर सवारी

“

काठमाडौँ, भदौ ८ । सरकारले भदौ १४ र १५ मा नेपालमा हुने बिमस्टेकको चौथो शिखर सम्मेलनलाई सहज बनाउन जोर–बिजोर नम्बरमा सवारीसाधन चलाउने निर्णय गरेको छ ।

बहुपक्षीय आर्थिक तथा प्राविधिक सहयोगका लागि बंगालका खाडीका राष्ट्रहरूको प्रयास (बिमस्टेक) सम्मेलनका पाहुनाहरुको आगमन व्यवस्थापनलाई मध्यनजर गर्दै जाम न्युन पार्न सरकारले जोर–बिजोर नम्बरमा सवारीसाधन चलाउने भएको हो ।

बिमस्टेकका सदस्य राष्ट्रका विशिष्ट पाहुनाको आवागमनलाई सहज बनाउन सरकारले काठमाडौंमा भदौ १३ देखि १५ सम्म जोर–बिजोर नम्बरमा सवारीसाधन चलाउने योजना बनाएको हो ।

जोर बिजोर नम्बर छनोट गर्दा अहिले सडकमा गुडिरहेका भन्दा आधा सवारी साधन कम हुनेछन् जसले काठमाडौँको अध्यधिक सवारीचाप घटाउन सहज बनाउनेछ ।

भदौ १४ र १५ गते काठमाडौं उपत्यकाका विद्यालयमा सार्वजनिक बिदा दिने तयारी गरिएपनि यसको औपचारिक निर्णय भने हुन बाँकी रहेको स्रोतले जनाएको छ ।

बिमस्टेकको चौथो शिखर सम्मेलन नेपालले आयोजना गर्न लागेको हो । भारतको विशेष पहलमा स्थापना भएको यो क्षेत्रीय मञ्चको सम्मेलन नेपालले पहिलो पटक आयोजना गर्दैछ ।

बिमस्टेकको चौथो शिखर सम्मेलनमा सहभागी हुन सात मुलुकका राष्ट्र प्रमुख वा सरकार प्रमुख परिवारसहित नेपाल आउनेछन्।

भारतका प्रधानमन्त्री नरेन्द्र मोदी, म्यानमारका राष्ट्रपति विन मिन्ट र थाइल्याण्डका प्रधानमन्त्री प्रयुत चा ओ चा नेपाल आउने तय भैसकेको छ। यसैगरी भुटानका प्रधानन्यायाधीश एवं मन्त्रिपरिषद अध्यक्ष छिरिङ वाङ्चुक, बंगलादेशका प्रधानमन्त्री शेख हसिना र श्रीलंकाका राष्ट्रपति मैथिरीपाला श्रीसेनाले बिमस्टेकमा सहभागी हुन काठमाडौं आउने छन्।

“