मलेसियामा कार्यरत दिनेश तीन वर्षदेखि सम्पर्कविहीन

“

पाल्पा, भाद्र, ६ । पाल्पा जिल्लाको माथागढी गाउँपालिका–२, रुप्सेका दिनेश झेडी मलेसियामा विगत तीन वर्षदेखि बेपत्ता भएका छन् ।

विगत तीन वर्षदेखि घरपरिवारसँग सम्पर्क विहीन भएका दिनेश लामो समय सम्म घरपरिवारमा सम्पर्क नहुँदा घरपरिवार चिन्तामा डुबेका छन् । पैसा कमाउन गएको छोराले घरमा फोनसमेत नगर्दा परिवारका सबै जना पिडामा भएको बुवा गुनबहादुर झेडीले बताए । विदेश जाँदा ऋण खोजेर पैसा कमाउन गएको तर घरपरिवारसँग सम्पर्क नहुँदा परिवारमा तनाव थपिएको हो ।

मलेसिया गएको पाँच वर्ष भइसकेको तर दुई वर्षको अवधिसम्म घरपरिवारसँग सम्पर्क हुने गरेपनि त्यसपछि सम्पर्क हुन नसकेको बुवा गुनबहादुरले बताए । विदेशबाट छोराको फोन आँउछ की भन्दै टेलिफोनको आशामा दिनरात बितेको आमा गीता झेडी बताउँछिन् ।

उनका जेठा दाइ सुन्दर झेडीले मलेसियामा रहेका नेपालीलाई सामाजिक सञ्जालमार्फत भाइको खोजी गरिदिन आग्रह गरिरहेका छन् ।

स्थानीय बासिन्दा तथा अगुवा युवा नवराज पन्थीले मलेसियामा रहेका नेपाली दाजुभाइलाई दिनेश झेडीलाई खोजेर घर पठाउन आग्रह गरेका छन् ।

“