नेपाली कामदार लान मलेसिया आत्तुर, विकल्प खोज्दै
![](https://www.makalukhabar.com/wp-content/uploads/2023/10/Final-icon-Logo-2023.png)
![](https://www.makalukhabar.com/wp-content/uploads/2021/01/nophoto.png)
“
काठमाडौँ, साउन १३ । नेपाली कामदार लैजाने प्रक्रियाका बारेमा सोमबार नेपाल र मलेसियाका प्रतिनिधिहरुबिच फेरि छलफल हुने भएको छ ।
अढाई महिनादेखि नेपाली कामदार रोकिएपछि तत्काल कसरी खुलाउन सकिन्छ भनेर नेपाली दूतावास मलेसियाका अधिकारीलाई त्यहाँको मानव संसाधन मन्त्रालयले छलफलका लागि बोलाएको छ ।
नेपालले मलेसिया कामदार पठाउन बन्द गरेको विषय र अबको प्रक्रियाका विषयमा दुई देशका अधिकारीहरुबिच कुरा हुनेछ । मानव संसाधन मन्त्री एम कुला सेगरनले नेपाली कामदार लामो समय नरोक्न आग्रह गर्दै यसका लागि मलेसियाले आवश्यक निर्णय लिने बताउँदै आएका छन् ।
यसअघि यहि विषयमा बुझ्न मन्त्री सेगरन नेपाली दूतावास पुगेका थिए भने गत मंगलबार पनि नेपाली दूतावासका अधिकारीहरुसँग संशोधन मन्त्रालयका अधिकारीले छलफल गरेका थिए ।
अढाई महिनादेखि कामदार पठाउन बन्द भएपछि मलेसिया कामदार लाने विकल्पमा छलफल गरिरहेको छ । नेपालले भने कामदारमाथिको अतिरिक्त शुल्क नहटाउँदा र अहिलेका संस्था खारेज नगरेसम्म नपठाउने निर्णयमा अडिग छ ।
श्रम रोजगार तथा सामाजिक सुरक्षा मन्त्री गोकर्ण विष्टले पटक–पटक यहि कुरा दोहोर्याउँदै आएका छन् । यसअघि भिसा लागेका कामदार समेत नपठाउने निर्णय गरेका विष्ट त्यो निर्णयबाट भने पछि हटेका थिए । जेठ २ गते पहिले नै भिसा लागेका कामदारलाई भने अन्तिम श्रम स्वीकृति खुला गरिएको छ ।
पहिलेको प्रक्रियाबाट नेपालले नपठाउने र नयाँ प्रक्रिया मलेसियाले तयार नगरीसकेकाले थप छलफल हुन लागेको त्यहाँका सञ्चारमाध्यमले जनाएका छन् ।
“
![](https://www.makalukhabar.com/wp-content/uploads/2023/10/Final-icon-Logo-2023.png)