देशभर मौसम सक्रिय, तीन दिन सम्म भारी वर्षा हुने

“

काठमाडौँ, असार १८ । देशभर मौसम सक्रिय रहेको हुँदा तीन दिन सम्म वर्षा हुने मौसमविदले जनाएका छन् । मौसम पूर्वानुमान महाशाखाले एक विज्ञप्ति जारी गर्दै तीन दिन सम्म हल्कादेखि मध्य र केही स्थानमा भारी वर्षा हुने जनाएको हो ।

मनसुन न्यून चापीय रेखा नेपालतर्फ सरेकाले देशका अधिकांश स्थानमा आगामी तीन दिनसम्म वर्षा हुने भएको हो ।

मनसुन पूर्ण रुपमा सक्रिय भएकाले अबको केही दिन वर्षा हुने मौसमविद् वरुण पौडेलले जानकारी दिए ।

तीन दिनसम्म लगातार वर्षा भए पनि दिउँसो पख केही बेर वर्षा रोकिने र विशेष गरी साँझ, राति र बिहान वढी वर्षा हुने उनको भनाइ छ । पूर्व, मध्य र पश्चिमका केही स्थानमा भारी वर्षाको सम्भावना रहेकाले सजक रहन मौसमविद्ले आग्रह गरेका छन्

विभागका अनुसार सबै प्रमुख नदीमा जलसतह बढ्दो क्रममा रहेको छ । सोमबार पनि देशका धेरैजसो स्थानमा हल्कादेखि मध्यम खालको वर्षा तथा पश्चिम, मध्य र पूर्वी भागको मध्यपहाडी क्षेत्रमा मध्यमदेखि भारी वर्षाको सम्भावना छ ।

“