डोल्पाको दुर्गम बस्तीमा पुग्यो मोटरबाटो, स्थानीयवासी हर्षित

“

डोल्पा, फागुन २९ । डोल्पाको ग्रामीण वस्तीमा मोटरबाटो पुगेपछि स्थानीयवासीले हर्षका आँशु झारेका छन् ।

समूद्र सतहदेखि झण्डै तीन हजार ५०० मीटर उचाइमा रहेको गाउँ माझफालबाट सदरमुकाम दुनै पुग्न दुई दिनको कठीन पैदलयात्रा गर्नु पर्दाको विगतको दिनलाई सम्झँदा आफ्नो गाउँमा मोटर पुग्ला भन्ने सपनामा पनि नसोचेका ८० वर्षीय वृद्ध रुद्र बुढाले घरको थाप्लोमै जिप गुडेको देखेपछि उनका आँखा खुशीले रसाए ।

उनी मात्र होइन ७० वर्षीय कर्णराम रोकायलाई पनि गाउँमा गाडी पुग्ला भन्ने लागेको थिएन । गाडी उद्घाटन हुँदैछ भनेर गाडी हेर्न माथिल्लो थाप्ला आएका कर्णराम रोकायले गाडीसहित पुगेका प्रमुख गणेश शाहीलाई बधाई दिँदै भने, “भीरको बाटो खनीखनी गाडी ल्यायौ प्रमुखले, नपत्याए हेर गाउँले आफ्नै एैनाले ।”

ठूलीभेरी नगरपालिका–५ मा पर्ने साविकको माझफाल गाविसको लाहारा गाउँनजिकै माथिल्लो लाग्ना भन्ने ठाउँसम्म आइतबारदेखि यातायातका साधन सञ्चालनमा ल्याइएको छ । त्रिपुरासुन्दरी यातायात, लेकबेसी यातायात र डोल्पो सहकारी यातायातका यात्रुले खचाखच भरिएका तीनवटा महेन्द्रा जिप र दैनिक उपभोग्यवस्तु बोकेको ट्र्याक्टरसहित माझफालको माथिल्लो लाग्ना पुगेका ठूलीभेरी नगरपालिकाका प्रमुख गणेशबहादुर शाहीले भव्य कार्यक्रमबीच रिबन काटेर बाटोको उद्घाटन गरेका थिए ।

पहिलोपटक गाउँमा यात्रुसहित पुगेका जिप र दैनिक उपभोग्य वस्तु बोकेको ट्र्याक्टरलाई स्थानीयवासीले फूलपाती अबिर टिकाले पूजाआजा गरेर भव्य स्वागत गरेका थिए । सदरमुकाम दुनैदेखि ४० किलोमिटर र विमानस्थल जुफालदेखि २५ किलोमिटर दुरीमा रहेको माथिल्लो लाग्नासम्मको मोटरबाटो ठूलीभेरी नगरपालिकाको रु एक करोडको लागतमा चार महिना लगाएर निर्माण गरिएको हो ।

राष्ट्रिय सडक सञ्जालसँग नजोडिएको कर्णाली प्रदेशको हिमाली जिल्ला डोल्पामा निमार्णाधीन रहेका आन्तरिक सडकमा हेलिकप्टरबाट ल्याइएका महेन्द्रा जिप यातायातको रुपमा सञ्चालनमा छन् ।

माझफालको माथिल्लो लाग्नामा यातायातका साधन महेन्द्रा जिप सञ्चालनमा आएपछि मध्य डोल्पाको विकट क्षेत्रको रुपमा रहेको माझफाल, दुरगाउँ, थरगाउँ र काँडाजाली लगायतका बासिन्दा र स्कुले विद्यार्थीलाई सदरमुकाम दुनै र विमानस्थल जुफाल आउनजान सहज भएको छ ।

नगरको पहिलो प्राथमिकता नै सडक विकास भएकाले नगरका सबै वडालाई सडक सञ्जालसँग जोड्ने र अबको पाँच वर्षभित्रमा ठूलीभेरी नगरपालिकाका सबै वडाका जनता आन्तरिक सडक यातायातको पहुँचमा पुग्ने प्रमुख गणेशबहादुर शाहीले बताए ।

उनका अनुसार अबको तीन महिनाभित्रमा साविकको माझफाल गाबिसको काँडातालीसम्म यातायातका साधन गुड्नेछन् । मोटरबाटोसहित यातायातका साधन जिप पुगेको अवसरमा माझफालका लाहारवासीले दिनभर र रातभर नाचगान गरी खुशीयाली मनाए ।

बहुमूल्य जडीबुटी यार्सागुम्बाको पकेट क्षेत्रको रुपमा रहेको माझफाल गाविसको माथिल्लो थाप्लोमा मोटर पुगेपछि अब कठिन र अत्यासलाग्दो झण्डै तीन घन्टाको उकालो बाटो हिँडेर नगरको केन्द्र जुफाल हुँदै दुनै जानुपर्ने बाध्यताबाट सर्वसाधारणले छुटकारा पाएका छन् ।

रासस

“