बस दुर्घटनामा एउटै गाउँका तीनजनाको मृत्यु

“

कात्तिक २, धनगढी । डोटी बस दुर्घटनामा परी एउटै गाउँका तीनजनाको मृत्यु भएको छ । बर्छेनबाट धनगढीतर्फ आउँदै गरेको सुदूरपश्चिम यातायातको ना ३ ख ५६४८ नम्बरको बस आज दुर्घटना हुँदा बड्डीकेदार गाउँपालिका–४ का ३५ वर्षीया मीनादेवी पुनमगर, ४५ वर्षीय जगदीश चन्द तथा लोकेन्द्र जेठाराकी तीन वर्षीया छोरी पुष्पा जेठाराको मृत्यु भएको घटनास्थलमा उद्धारमा खटिएका ट्राफिक प्रहरी कृष्ण भण्डारीले जानकारी दिए ।

बस सडकबाट झन्डै १०० मिटर तल खस्दा १३ पुरुष, चार महिला तथा चार बालबालिका घाइते भएका छन् । घाइतेमध्ये पाँचजनाको अवस्था गम्भीर छ । इलाका प्रहरी कार्यालय बिपी नगर, ट्राफिक प्रहरी र स्थानीय बासिन्दाले घाइतेको उद्धार गरेका थिए । घाइतेलाई प्रहरीले उपचारका लागि धनगढीतर्फ ल्याउँदै छ । रासस

“