एक चीन नीति विपरीतका गतिविधिमा सरकारले अनुमति दिएको भन्दै एमालेको आपत्ति

काठमाडौँ । प्रमुख प्रतिपक्षी दल नेकपा (एमाले) ले सरकारले एक चीन नीति विपरीतका गतिविधिलाई प्रश्रय दिएको भन्दै प्रतिनिधि सभामा आपत्ति जनाएको छ ।

बिहीबारको प्रतिनिधि सभा बैठकमा बोल्दै एमालेका प्रमुख सचेतक ऐनबहादुर महरले तिब्बती धर्मगुरु दलाई लामाको जन्मोत्सव मनाउन सरकारले अनुमति दिएकोमा आलोचना गरे ।

असार २२ गते स्वयम्भूस्थित नामग्याल निम्न माध्यमिक विद्यालयमा आयोजित उक्त कार्यक्रमले नेपाल र चीनबीचको सुमधुर सम्बन्धमा आँच पुर्याएको उनको दाबी छ ।

प्रमुख सचेतक महरले उक्त कार्यक्रममा अमेरिकी, फ्रान्सेली, युरोपेली युनियन र अस्ट्रेलियाली राजदूतहरूको उपस्थिति हुनुलाई अर्थपूर्ण र गम्भीर विषय भएको बताए ।

नेपालको भूमि छिमेकी राष्ट्रहरूका विरुद्ध प्रयोग हुन नदिने राष्ट्रिय प्रतिबद्धता विपरीत सरकारले राष्ट्रहित प्रतिकूल र अपरिपक्व नीति लिएको उनको आरोप छ। यसै सन्दर्भमा चीनका लागि नेपालका सात जना पूर्व राजदूतहरूले समेत विज्ञप्तिमार्फत विरोध जनाएको स्मरण गराउँदै महरले सरकारको नियतमाथि प्रश्न उठाए ।

उनले भने ‘पश्चिमा शक्तिहरू नेपाललाई चीन विरोधी अखडा बनाउन र मुलुकलाई द्वन्द्वतर्फ धकेल्ने षडयन्त्रमा लागिरहेको यस घटनाले पुष्टि गरेको छ । के वर्तमान सरकार एक चीन नीतिको विरुद्धमा उभिएको हो ? के सरकारले पञ्चशीलको सिद्धान्त र असंलग्न परराष्ट्र नीतिलाई परित्याग गरेको हो ? यसबारे सरकारले सदनलाई स्पष्ट पार्नुपर्छ ।’

परराष्ट्र नीतिका सन्दर्भमा सरकारले केटाकेटीपन देखाएको टिप्पणी गर्दै महरले छिमेकीसँगको सम्बन्धमा सजग, गम्भीर र जिम्मेवार बन्न सरकारको ध्यानाकर्षण गराए । छिमेकी राष्ट्रसँगको सम्बन्धलाई खेलौनाको रूपमा नलिन र नेपालको सर्वोपरि हितमा काम गर्न समेत उनले आग्रह गरे ।