संविधान र गणतन्त्रका उपलब्धिको रक्षा गर्न प्रतिबद्ध छौँ: रवि लामिछाने

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले संविधान र संघिय लोकतान्त्रिक गणतन्त्रको उपलब्धिको रक्षा गर्न आफूहरू प्रतिबद्ध रहेको बताएका छन् ।

शनिवार चितवनमा बसेको रास्वपाको केन्द्रीय समिति बैठकमा उनले लोकतान्त्रिक मूल्य–मान्यताप्रति सधैँ प्रतिबद्ध रहने बताएका हुन् ।

उनले मुलुकमा आएको परिवर्तन र उपलब्धिहरू विगतका सङ्घर्ष तथा बलिदानकै जगमा सम्भव भएको उल्लेख गरे । संघीय लोकतान्त्रिक गणतन्त्र, संविधान र परिवर्तनका उपलब्धिहरूको सम्मानको आधारमा उभिनुमा आफूलाई गर्व लागेको उनको भनाई छ ।

उनले विगतका त्याग र बलिदानकै कारण आज देशलाई फराकिलो दृष्टिकोणबाट हेर्ने अवसर प्राप्त भएको उल्लेख गर्दै उनले लोकतन्त्र र यसको मूल्यमान्यताबाट आफू तथा पार्टी कहिल्यै विचलित नहुने प्रतिबद्धता व्यक्त गरे ।

उनले भने ‘संघीय लोकतान्त्रिक गणतन्त्र, विभिन्न परिवर्तन, देशको संविधान, यो मुलुकलाई यहाँसम्म ल्याइ पुर्याउँदा भएका त्याग, बलिदान, संघर्षहरूको सम्मानको जगमा हामी उभिएका छौँ र हामीलाई यसमा गर्व छ । हामी गर्वका साथ यो परिवर्तनको संघारमा उभिएका छौँ र हिजोको त्याग र बलिदानीको उचाइको काँधमा उभिएको हुनाले, बस्न पाएको हुनाले नै हामी यति फराकिलो दृश्य देख्न पाइरहेका छौँ । त्यसैले म तपाईँहरूलाई प्रतिबद्धताका साथ फेरि पनि भन्न चाहन्छु कि यी मूल्य र मान्यताहरू र लोकतन्त्रप्रतिको प्रतिबद्धताबाट हामी कहिल्यै विमुख हुने छैनौँ, म कहिल्यै विमुख हुने छैन ।’

उनले पार्टीको आन्तरिक लोकतन्त्रलाई पनि मजबुत बनाउने बताए । पार्टी स्थापनाका समयमा केन्द्रीय समितिमा राख्ने मान्छे नपाएको स्मरण गर्दै उनले हाल केन्द्रीय समितिमा सबैभन्दा बढी आंकाक्षी देखिएको बताए । उनले महाधिवेशनमा स्वच्छ प्रतिस्पर्धा गर्न पनि आग्रह गरे ।

पार्टीमा विगतमा भएका गल्ती कमजोरीलाई सच्याउँदै अगाडी बढ्ने उनको भनाई छ ।