मन्त्री छान्न गोप्य छलफलमा जुटे रवि–बालेन

काठमाडौं । राष्ट्रिय स्वतन्त्र पार्टीले संसदीय दलको नेतामा बालेन्द्र शाह (बालेन)लाई चयन गरेको छ । दलको निर्णयसँगै उनी भोलि (शुक्रबार) प्रधानमन्त्रीको शपथ लिने तयारीमा रहेका छन् ।

पार्टीले प्रधानमन्त्रीसँगै मन्त्रीहरूको पनि शपथ गराउने तयारी गरेको स्रोतले जनाएको छ । त्यसअघि भने मन्त्रीहरूको नाम टुंग्याउन पार्टीभित्र उच्चस्तरीय छलफल सुरु भएको छ ।

सोहीअनुसार, पार्टी सभापति रवि लामिछाने र वरिष्ठ नेता शाहबीच मन्त्री छनोटबारे छलफल चलिरहेको छ । बनस्थलीस्थित पार्टी कार्यालयमा केन्द्रीय समिति र संसदीय दलको बैठक सकिएपछि दुवै नेता एउटै गाडीमा बाहिरिएका थिए ।

स्रोतका अनुसार मन्त्रीको नाम टुंग्याउन दुई नेताबीच मात्रै गोप्य छलफल भइरहेको छ । तर उक्त छलफल कहाँ भइरहेको छ भन्ने सार्वजनिक गरिएको छैन ।

पार्टीका केही नेताहरूका अनुसार हालसम्म मन्त्रीहरूको नाम अन्तिम रूपले तय भइसकेको छैन ।