त्रिभुवन अन्तर्राष्ट्रिय विमानस्थल क्षेत्रमा निषेधाज्ञा, सुरक्षा सतर्कता उच्च

काठमाडौं । त्रिभुवन अन्तर्राष्ट्रिय विमानस्थलको सुरक्षा संवेदनशीलतालाई मध्यनजर गर्दै जिल्ला प्रशासन कार्यालय काठमाडौंले विमानस्थल परिसर र आसपासका क्षेत्रमा निषेधाज्ञा जारी गरेको छ । आगामी फागुन १ गते विभिन्न राजनीतिक दल तथा समूहहरूले विमानस्थल केन्द्रित विरोध प्रदर्शनको तयारी गरेपछि प्रशासनले सुरक्षा चुनौतीलाई ध्यान दिँदै यस्तो कदम चालेको हो ।

बिहीबारदेखि लागू हुने गरी जारी गरिएको यो आदेश आगामी एक महिनासम्म कायम रहनेछ । निषेधाज्ञा लागू भएसँगै अब विमानस्थल क्षेत्रमा पाँच जनाभन्दा बढी व्यक्ति भेला भई अनसन, धर्ना, घेराउ, जुलुस, प्रदर्शन तथा सभा जस्ता कुनै पनि विरोधका कार्यक्रम गर्न पाइने छैन । प्रमुख जिल्ला अधिकारी ईश्वरराज पौडेलद्वारा जारी आदेशमा विमानस्थलको मुख्य प्रवेशद्वार (गोल्डेन गेट) देखि आन्तरिक तथा अन्तर्राष्ट्रिय टर्मिनल भवन, पार्किङ स्थल र परिसरभित्रका सम्पूर्ण सडक खण्डहरूलाई निषेधित क्षेत्र घोषणा गरिएको उल्लेख छ ।

‘अत्यन्तै संवेदनशील मानिने विमानस्थल क्षेत्रमा हुने भीडभाड र प्रदर्शनले हवाई सेवामा अवरोध पुग्न सक्ने र उत्तेजित भीडबाट तोडफोड वा आगजनी जस्ता उच्छृङ्खल गतिविधि हुनसक्ने जोखिम देखिएकाले यो आदेश जारी गरिएको हो,’ प्रशासनद्वारा जारी विज्ञप्तिमा भनिएको छ ।

स्थानीय प्रशासनले नागरिकको विचार र अभिव्यक्तिको स्वतन्त्रता तथा शान्तिपूर्ण रुपमा भेला हुन पाउने संवैधानिक अधिकारप्रति आफूहरू प्रतिबद्ध रहेको समेत स्पष्ट पारेको छ । निषेधाज्ञा तोकिएको क्षेत्र बाहेकका अन्य स्थानमा भने शान्तिपूर्ण विरोध प्रदर्शन गर्न बाधा नपर्ने प्रशासनको भनाइ छ ।

यद्यपि, पूर्वजानकारी गराई गरिने विरोधका कार्यक्रमका क्रममा सरकारी, सार्वजनिक वा व्यक्तिगत सम्पत्तिमा कुनै पनि किसिमको क्षति पुगेमा त्यसको शोधभर्ना वा क्षतिपूर्ति आयोजकबाटै असुलउपर गरिने चेतावनी समेत स्थानीय प्रशासनले दिएको छ । फागुन १ गते हुने भनिएको प्रदर्शनलाई लक्षित गरी विमानस्थल आसपासको सुरक्षा व्यवस्थामा समेत थप कडाइ गरिएको छ ।