देउवा र ओलीलाई भेटपछि बालेनले भने, काठमाडौँको विकासका लागि सबैको साथ चाहिन्छ, भेटलाई अन्यथा नलिउँ

देउवा र ओलीलाई भेटपछि बालेनले भने, काठमाडौँको विकासका लागि सबैको साथ चाहिन्छ, भेटलाई अन्यथा नलिउँ

काठमाडाैँ । काठमाडाैँ महानगरपालिकाका मेयर बालेन्द्र शाहले काठमाडाैँकाे विकासका लागि सबैकाे साथ चाहिने बताएका छन् ।

प्रधानमन्त्री शेरबहादुर देउवा र पूर्व प्रधानमन्त्री तथा नेकपा एमालेका अध्यक्ष केपी शर्मा ओलीसँग भेटेकाे फाेटाे सामाजिक सञ्जालमा राख्दै उनले आफ्नो अभियान लामाे र पवित्र भएकाले सबैकाे साथ सहयाेग चाहिने बताएका छन् ।

उनले लेखेका छन्, ‘हाम्रो लक्ष्यहरु विशाल र पवित्र छन् । आममान्छेको जीवनमा सकारात्मक परिवर्तन ल्याउन विशेष र बृहत सोचको आवश्यकता छ । यसका लागि सबैसँग सहकार्य अनिवार्य छ ।’

स्वतन्त्र हुनुको अर्थ कुनै पनि पार्टी, समूह वा नेताप्रति निरपेक्ष रहनु भएकाे बताउँदै उनले सबैसँग सम्मानजनक निकटताको अभ्यास गर्नु पनि निरपेक्षता रहेकाे उल्लेख गरे ।

त्यस्तै, उनले काठमाडाैँकाे विकास र उन्नतिका लागि धेरै पहिलादेखि मानिसहरूसँग भेटेकाे र भावी दिनमा पनि याे क्रम जारी रहने बताए । उनले भेटघाटलाई अन्यथा नबुझ्दिन समेत सर्वसाधारणमा अपिल गरेका छन् ।

उनकाे अपिल जस्ताकाे तस्तैः

हाम्रो लक्ष्यहरु विशाल र पवित्र छन् । आममान्छेको जीवनमा सकारात्मक परिवर्तन ल्याउन विशेष र बृहत सोचको आवश्यकता छ । यसका लागि सबैसँग सहकार्य अनिवार्य छ ।

राजनैतिकरुपमा हामीलाई यो अभियानमा केहि सजिलो पनि छ । किनकि स्वतन्त्र हुनुको अर्थ केवल चुनावमा उम्मेदवारी दिदा मात्रै रहदैन । स्वतन्त्र हुनुको अर्थ कुनै पनि पार्टी वा समुह वा नेताप्रति निरपेक्ष रहनु पनि हुन्छ । सबैसँग सम्मानजनक निकटताको अभ्यास गर्नुमा पनि हुन्छ ।

काठमाण्डौँको उन्नति, समृद्धि र सकारात्मक परिवर्तनका लागि हामीले छलफल गर्न, सुझाब समेट्न र सहकार्यका लागि पहल गर्न धेरै भन्दा धेरै व्यक्तित्वसँग भेटघाट गर्ने गरेका छौँ । यो सिलसिला उम्मेदवारी घोषणा गर्नु भन्दा पहिलेदेखि सुरु भएर निकै पछिसम्म पनि रहिरहने छ । समय अनुकुलताका कारण कसैसँग अघि वा पछि भेट हुन सक्छ । यसलाई अन्यथा नबुझिदिन अपिल गर्दछौँ ।

यसैक्रममा केहि अघि हामीले पूर्वप्रधानमन्त्री केपी शर्मा ओलीलाई भेटेका थियौँ; आज सम्माननीय प्रधानमन्त्री शेरबहादुर देउवासँग भेट गरेका छौँ । भेटघाटका क्रममा उहाँहरुले दिनु भएको प्रेरणाले हामीलाई थप उर्जावान बनाएको छ ।