निषेधाज्ञा उल्लंघन गर्ने धेरै [फोटोफिचर]

विराटनगर । कोभिड-१९ संक्रमण अत्याधिक बढेसँगै मोरङमा आजदेखि निषेधाज्ञा जारी गरिएको छ । तर, बजारमा आउजाउ गर्नेको संख्यामा भने कमि देखिँदैन ।

क्रमण दैनिक बढिरहेका बेला त्यसको रोकथाम तथा नियनत्रणको लागि भन्दै जिल्ला प्रशासन कार्यालय मोरङले निषेधाज्ञा जारी गरेको हो । कोभिड संक्रमणको उच्च दर रहेको विराटनगर महानगरपालिकासहित बुढिगंगा गाउँपालिका, जहदा गाउँपालिका, कटहरी गाउँपालिकाका वडा नं १,२, ३, र ४ तथा भारत र सुनसरी जिल्लासंग जोडिएको सीमा क्षेत्रहरुमा निषेधाज्ञा जारी गरिएको छ ।कोरोनाको चेन ब्रेक गर्ने भनेर गरिएको निषेधाज्ञाको प्रभाव आंशिक परेको देखिएको छ । निषधाज्ञाको पालना नागरिकले नगर्दां सडकमा खटिएका प्रहरीहरु तनावमा देखिन्थे । लकडाउनको पहिलो दिन भएको कारण निषेधाज्ञा उल्लंघन गर्नेलाई प्रहरीले बुझाउँदै छाडेको छ । मोरङका एसपी सन्तोष खड्का नागरिकले लकडाउन मेरो लागि हो भनेर नबुझ्दासम्म प्रहरीले मात्र केही गर्न नसक्ने बताए ।नागरिकको जीउज्यानको सुरक्षाको लागि सडकमा खटिएका प्रहरीले मात्र कार्यान्वयन नहुने भएकोले नागरिकले नै यसको कार्यान्वायनमा जोड दिनुपर्ने बताए । बिहानैदेखि उद्योग धन्दा कलकारखाना संचालनमा रहेका छन् । केही सिटी, अटो सडकमा निस्किएर नियम उल्लंघन गरेका छन् भने उनीहरुलाई प्रहरीले नियान्त्रणमा लिएको छ ।निषेधाज्ञाको समयमा औषधी, खाद्यबस्तु तथा अत्याबश्यक वस्तु वा सेवा खरिदबाहेक कुनै पनि व्यक्ति घर बाहिर निस्कन नपाउने भनिएको छ । खाद्यवस्तु, इन्धन, खाना पकाउने ग्याँस, तरकारी, फलफूल, दुध, डेरी लगायत अत्यावश्यक सामाग्री आपुर्ति गर्ने पसल, व्यवसायहरु बिहान १० बजेसम्म संचालन गर्न पाउने भएको कारण बिहान चहल पहल बढेको हुनसक्ने सुरक्षा अधिकारीहरुको भनाई छ ।निषेधाज्ञाको अवधिमा गुद्री बजार, सब्जीमण्डी, होटल, रेष्टुरा, सैलुन, ई-रिक्सा संचालन भने गर्न पाउने छैनन् । निर्माण सामाग्री खरिदको हकमा भने बिहान १० बजेसम्म खरित गरिसक्न भनिएको छ । दैनिक रुपमा गरिने नित्य पुजा, प्रार्थनाबाहेकका धार्मिक तथा साँस्कृतिक कार्यहरु, मेला, जात्रा, चाडपर्व, हाट बजार, महोत्सव, भेला तथा अन्य सामूहिक कार्य गर्न रोक लगाईएको छ ।निषेधाज्ञाको समयमा अत्यावश्यक सेवामा प्रयोग हुने विद्युत, खानेपानी, सञ्चार, बैक, फोहोरमैला व्यवस्थापन, खाद्यान्न, पशुआहार ढुवानीका साधन, एम्बुलेन्स, शव वहान, सरकारी नम्बरका साधनहरुबाहेक अन्य सञ्चालन नगर्न भनिएको छ ।छिमेकी मुलुक भारतसँग हुने आवागमन पूर्णरुपमा बन्द गर्ने, रातिको समयमा ८ बजेदेखि विहान ५ बजेसम्म हिडडुल गर्न नपाइने, उपभोग्य वस्तुको कृतिम अभाव सिर्जना गरे कानून बमोजिम कारवाही हुने, होटल रेष्टुरेन्टहरु होम प्याक तथा होम डेलिभरी प्रयोजनका लागि मात्र खुला रहने भनिएको छ ।