कर्मचारीको ट्रेड युनियन अधिकार खारेज गर्ने सरकारको कदम सफल दिँदैनौँ: सिटौला

काठमाडौँ । नेपाली काँग्रेसका सांसद कृष्णप्रसाद सिटौलाले कर्मचारीको ट्रेड युनियन अधिकार खारेज गर्ने सरकारको कदम कुनैपनि हालतमा सफल हुन नदिने चेतावनी दिएका छन् ।

राष्ट्रिय सभाको बिहीबारको बैठकमा बोल्दै सांसद सिटौलाले सरकारले ट्रेड युनियन अधिकार खारेज गर्न खोजेको खण्डमा त्यसविरुद्ध प्रतिपक्ष एकजुट भएर उभिने चेतावनी दिए ।

उनले ट्रेड युनियनको अधिकार संविधानप्रदत्त भएकाले कुनैपनि हालतमा त्यसलाई समाप्त गर्ने प्रयास स्वीकार्य नहुने बताए । उनले ट्रेड युनियन आन्दोलन र श्रमिक आन्दोलनले लोकतान्त्रिक अधिकार स्थापनामा महत्त्वपूर्ण भूमिका खेलेको स्मरण गर्दै श्रमिकहरूले आफ्नो आवाज उठाउने अधिकार कसैले खोस्न नसक्ने बताए ।

सिटौलाले सरकारले संविधानअनुसार काम गरोस् भन्ने प्रतिपक्षको चाहना रहेपनि गलत कदमविरुद्ध भने कडा प्रतिरोध हुने स्पष्ट पारे ।

उनले भने ‘ट्रेड युनियनको अधिकार नेपालको संविधानले दिएको छ । यसलाई खारेज गर्ने कुरा कुनैपनि हालतमा स्वीकार गर्न सकिँदैन । सरकारले अध्यादेशमार्फत ट्रेड युनियन खारेज गर्न ल्याएको अध्यादेशको विषयमा सर्वोच्च अदालतले अन्तरिम आदेश समेत दिइसकेको अवस्था छ । नेपालको राजनीति आन्दोलन र श्रमिक आन्दोलनको अत्यन्त महत्त्वपूर्ण भूमिका रहेको छ । उनीहरूले आफ्नो आवाज उठाउन सक्छन् । हामी ती युनियनको खारेज गर्ने सरकारको कार्यलाई कुनैपनि आधारमा सफल हुन दिँदैनौँ । यहाँ हामी सबै प्रतिपक्षी दलका नेताहरू मात्र छौँ । तर सरकारले संविधानबमोजिम काम गर्न सकोस् भन्ने विचार रहन्छ । तर सरकारका गलत कुराहरू रोक्न पनि चाहन्छौँ ।’

उनले ट्रेड युनियन खारेज गर्ने सरकारी प्रयास कुनैपनि आधारमा सफल हुन नदिने चेतावनी दिए ।