मेची–महाकाली राष्ट्रिय उद्धार यात्रा–२०८३ को थालनी
मकालु खबर
काठमाडौं । यस बर्सातको समयमा कसैले पनि सडक पेटीमा कष्टकर जीवनयापन गर्न नपरोस् भन्ने करुणामय भावनाका साथ ‘मेची–महाकाली राष्ट्रिय उद्धार यात्रा– २०८३’ को थालनी गरिएको छ । यही वैशाख वैशाख २७ देखि जेठ २२ गतेसम्म हुन लागेको यस अभियानको आज मेची पुलबाट औपचारिक शुभारम्भ हुँदै छ ।
यात्राको औपचारिक शुभारम्भ समारोहलाई सम्बोधन गर्दै राष्ट्रिय स्वतन्त्र पार्टीका महामन्त्री तथा प्रतिनिधिसभा सदस्य कबिन्द्र बुर्लाकोटीले विगत १३ वर्षदेखि सहयोगापेक्षी सडकआश्रित मानवहरूको उद्धारमा मानव सेवा आश्रमले राज्यलाई पुर्याएको सहयोग महत्त्वपूर्ण रहेको बताए । उनले यस मानवीय कार्यमा राज्यका तीनै तहका सरकारहरूको सहयोग आवश्यक पर्दछ भने ।
काठमाडौँ महानगरपालिकाका कार्यवाहक प्रमुख सुनिता डङ्गोलले महानगरपालिकालाई स्वच्छ, सभ्य र व्यवस्थितसँगै आश्रयहीन बन्न पुगेका सडक मानवहरूको उचित व्यवस्थापनका लागि मानव सेवा आश्रमलाई सहयोग गर्दै आएको र आगामी दिनमा पनि यसलाई अझ बढाउँदै लैजाने नीति रहेको प्रस्ट पारिन् ।
वरिष्ठ कलाकार मदनकृष्ण श्रेष्ठले समाज सेवाभन्दा अर्को ठुलो पुण्य कार्य नभएको बताउँदै मानव कल्याणमा लाग्न सबैलाई आग्रह गरे ।
गायिका आनी छोइङले मानव सेवा आश्रमको सेवा भावबाट आफूलाई सक्रिय रूपमा समाज सेवामा लाग्न प्रेरित गरेको बताउँदै मानव सेवामा गरिएको लगानी जीवन पर्यन्तसम्म आत्मसन्तुष्टि र वास्तविक पुण्य प्राप्त हुनेछ भनिन् ।
मानव सेवा आश्रमका संस्थापक अध्यक्ष रामजी अधिकारीले नाथैनाथले बास गरेको हाम्रो देश नेपालको सडकपेटी एवं सार्वजनिक स्थलहरूले कसैले पनि अनाथ भएर बस्न नपर्ने राष्ट्र निर्माण गर्न मानवता, करुणा, सेवा, प्रेम र सद्भावनालाई अझ मजबुत बनाउँदै लैजान यस अभियानको थालनी गरिएको बताउँदै आश्रम र आनीछोइङ डोल्मा फाउन्डेसनको सहकार्यमा तेस्रो पटक यो अभियान सञ्चालन गर्न लागिएको जानकारी दिए ।
गायिका एवं समाजसेवी आनीछोइङ डोल्माको नेतृत्वमा २६ जना स्वयंसेवकले यात्रामा परिवार वा आफन्तको आश्रय पाउन नसकी सडकमा जीवन बिताइरहेका नागरिकहरूको उद्धार गरी आश्रमका देशका विभिन्न जिल्लामा रहेका आश्रमहरूमा पुनस्र्थापित गरिनेछ ।
मकालु खबर
