वातावरण संरक्षणमा पोखराको नयाँ अभियान: जन्मोत्सवमा वृक्षारोपणदेखि तालतलैया सफाइसम्म

पाेखरा । पोखरालाई विश्वकै सुन्दर र स्वच्छ सहरको रूपमा कायम राख्न महानगरले ‘ग्रिन पोखरा, क्लिन पोखरा’ अभियानलाई एउटा संस्कृतिको रूपमा अघि बढाएको छ ।

मेयर धनराज आचार्यले संसारभरका पर्यटकहरू आउने सहर भएकाले यसको स्वच्छता र हरियालीलाई उच्च प्राथमिकतामा राखिएको बताए । महानगरले खाली जमिनहरूमा पोखराकै रैथाने बिरुवाहरू लगाउनका लागि २ लाख २६ हजार वृक्षारोपण गर्ने अभियान गत वर्षबाट सुरु गरेको छ । यो अभियान अर्को वर्षसम्ममा पूरा गर्ने लक्ष्य राखिएको छ ।

यसमा निजी क्षेत्र, संघसंस्था र हरेक नागरिकलाई सहभागी गराइएको छ । विशेषगरी ‘आफ्नो जन्मोत्सवमा कम्तिमा २ वटा बिरुवा रोप्नुहोस्’ भन्ने भावनात्मक अभियानले नागरिकहरूमा वृक्षारोपणप्रति ठूलो उत्साह जगाएको मेयर आचार्यले बताए ।

सरसफाईको क्षेत्रमा पनि महानगरले इतिहासमै पहिलो पटक व्यवस्थित कार्ययोजना बनाएको छ । शहरका डिल, भीर, तालतलैया, मूल बाटो, शाखा बाटो र प्रशाखा बाटाहरूको सफाई र व्यवस्थापनका लागि स्पष्ट खाका तयार पारिएको छ ।

उनले भने, ‘हामीले यहाँ ग्रिन पोखरा, क्लिन पोखराको अभियान पनि सञ्चालन गरेका छौँ । संसारभरका पर्यटकहरू आउने भएकाले हामीले यो अभियान चलाएका हौँ । खाली जमिनहरुमा रैथाने बिरुवाहरु लगाउनका लागि हामीले २ लाख २६ हजार प्लानटेशन गर्ने अभियान शुरु गरेका छौँ गत वर्षबाट । यो अभियान अर्को वर्षसम्म हामी पूरा गर्छौँ । सबै निजी क्षेत्र, हरेक व्यक्ति, जन्मोत्सवमा पनि कम्तिमा २ विरुवा रोप्नुस भन्ने अभियान चलाएका छौँ ।’

तालहरूको संरक्षण र सफाईका लागि नियमित अभियानहरू सञ्चालन भइरहेका छन् । पोखरालाई केवल बाटो सफा भएको शहर मात्र नभई हरियाली र प्राकृतिक सुन्दरताले भरिपूर्ण शहर बनाउन महानगरले दीर्घकालीन सोचका साथ काम गरिरहेको छ । —न्युज एजेन्सी नेपाल