बैंकमा पैसा थुप्रिएको छ, कर्जा प्रवाह गर्न सकेका छैनौँ: कोइराला

काठमाडौँ । नेपाल बैंकर्स संघका अध्यक्ष सन्तोष कोइरालाले अहिले बैंकिङ प्रणालीमा ठूलो परिमाणमा निक्षेप भए पनि कर्जा विस्तारको गति कमजोर रहेको बताएका छन् ।

नागरिक लगानी कोषको ३६ औँ वार्षिकोत्सवलाई सम्बोधन गर्दै उनले हाल बैङ्कहरूसँग करिब ७७ खर्ब रुपैयाँ निक्षेप रहेको बताएका हुन् ।

अध्यक्ष कोइरालाले सो मध्येबाट बैङ्कहरूले ५८ खर्ब रुपैयाँ जति कर्जा प्रवाह गरिएको जानकारी दिँदै पछिल्लो समय कर्जा प्रवाहको वृद्धि दर बढ्न नसकेको बताए । कोइरालाले कर्जा सुस्तता आउनुको कारण भने खुलाउनु भएन । उनले बैंकिङ क्षेत्रमा विभिन्न प्रकारका चुनौतीहरू तमाम रहेको समेत बताए ।

कोईरालाकाअनुसार कर्जा असुलीका लागि जाने क्रममा बैंकका कर्मचारीहरूले विभिन्न धम्की र दबाब सामना गर्नुपरेको छ । बैंकर्स संघले पनि यस विषयमा अझ सक्रिय भएर अघि बढ्नुपर्ने अवस्था आएको उनको भनाइ छ ।

अध्यक्ष कोइरालाले भने ‘अहिले बैंकसँग ७७ खर्बको डिपोजिट छ । ५८ खर्ब जति लोन प्रवाह गरेका छौँ । कर्जा प्रवाहको ग्रोथ बढ्न सकिरहेको छैन । बैंकिङ क्षेत्रमा विभिन्न प्रकारका चुनौतीहरू पनि छन् । ऋण उठाउन जाने क्रममा धेरै प्रकारका थ्रेडसहरुछन् । बैंकर्स संघले अलिकति अघि बढ्नुपर्ने अवस्था पनि आइरहेका छन् । कुनै भीडले बैंकको पैसा तिर्नु पदैन भन्ने कुरा आयो भने यसले समग्र अर्थतन्त्रलाई असर पार्छ । पैसा तिर्नुपर्दैन भनेर भाष्य बन्ने र कर्मचारीलाई विभिन्न प्रकारका थ्रेडसहरु जस्तै कालोमोसो दल्ने, जुत्ता माला लगाउने जुन हामीले देख्यौँ, यस्तो खालको कुराहरू आयो भने भविष्यमा हाम्रो इकोनोमीलाई राम्रो गर्दैन् ।’

उनकाअनुसार ऋण तिर्नु पर्दैन जस्ता भाष्य बनाउन खोजिएको बताउँदै यस्ता गतिविधि र गलत सन्देश फैलिन थालेमा भविष्यमा नेपालको अर्थतन्त्रका लागि राम्रो संकेत हुनेछैन ।