आवेगमा होइन, विवेकले मतदान गरौँ : विश्वप्रकाश शर्मा

काठमाडौं । नेपाली कांग्रेसका उपसभापति एवं पूर्व सांसद विश्वप्रकाश शर्माले झापाबाट आफ्नो मताधिकार प्रयोग गरेका छन् । झापा क्षेत्र नम्बर १ अन्तर्गत मेचीनगर-९ स्थित कविशिरोमणी माध्यमिक विद्यालयको मतदान केन्द्र पुगेर उनले बिहीबार बिहान साढे ७ बजे मतदान गरेका हुन् ।

मतदानपछि सञ्चारकर्मीहरूसँग संक्षिप्त कुराकानी गर्दै शर्माले निर्वाचनलाई लोकतन्त्रको सबैभन्दा सुन्दर र जीवन्त अभ्यासको रूपमा चित्रण गरे । उनले सम्पूर्ण मतदाताहरूलाई कुनै पनि प्रकारको आवेग र उत्तेजनाबाट मुक्त रहेर आफ्नो विवेक प्रयोग गर्न आग्रह गरेका छन् । ‘मैले बिहानै मतदान गरिसकेको छु । यो लोकतान्त्रिक पद्धतिको एउटा महत्त्वपूर्ण अवसर हो,’ नेता शर्माले भने, ‘म अपेक्षा गर्दछु कि सम्पूर्ण आदरणीय मतदाताहरूले मुलुकको निकास र समाधानका लागि आफ्नो विवेकको सही प्रयोग गर्नुहुनेछ ।’

कांग्रेसको केन्द्रीय निर्वाचन परिचालन समितिका संयोजकसमेत रहेका उपसभापति शर्माले यसपटकको निर्वाचनबाट नेपाली कांग्रेस सबैभन्दा ठूलो दलका रूपमा विजयी हुने दाबी गरे । आफूले आफ्नै पार्टीको चुनाव चिन्ह ‘रूख’ मा मतदान गरेको जानकारी दिँदै उनले देशभर कांग्रेसको पक्षमा बलियो लहर सिर्जना भएको जिकिर गरे । निर्वाचन अभियानको क्रममा आफू देशका सातै प्रदेशका ४० भन्दा बढी जिल्ला पुगेको स्मरण गर्दै उनले भने, ‘सुदूरपश्चिमको डोल्पादेखि सुदूरपूर्वको पाँचथर र हिमालदेखि मधेससम्म पुग्दा कांग्रेसप्रति जनताको ठूलो भरोसा देखिएको छ । त्यसैले यसपटक कांग्रेस पहिलो शक्ति बन्नेमा म विश्वस्त छु ।’

उनले निर्वाचनलाई शान्तिपूर्ण, भयरहित र सौहार्दपूर्ण वातावरणमा सम्पन्न गर्न सबै राजनीतिक दल र नागरिकहरूलाई सहयोगका लागि अपील समेत गरेका छन् । देशभरि नै उत्साहजनक रूपमा मतदान भइरहेको भन्दै उनले लोकतन्त्रको यो अभ्यासलाई सफल बनाउन सबैको भूमिका महत्त्वपूर्ण हुने उल्लेख गरे ।