आशिष शर्मा किन कपिलवस्तु-१ मा ?

कपिलवस्तु । कपिलवस्तु निर्वाचन क्षेत्र नम्बर १ मा यतिबेला आशिष शर्माको चर्चा चुलिएको छ । उनलाई केवल एक राजनीतिक पात्रका रूपमा मात्र नभई, समृद्धिको स्पष्ट मार्गचित्र र कार्यक्षमता बोकेका एक दूरदर्शी नेतृत्वका रूपमा हेरिएको छ । पार्टीको औपचारिक निर्णयले उनलाई अवसर नदिए पनि, उनको व्यक्तित्व, कार्यशैली र जनताप्रतिको प्रतिबद्धताले उनलाई जनमानसमा अझ स्थापित गराएको छ ।

उनको परिचय केवल पूर्व राजदूत दीपकुमार उपाध्यायको छोरा हुनुमा मात्र सीमित छैन । आफ्नो कडा परिश्रम, अनुशासन र क्षमताका कारण उनले समाजमा एक सशक्त र स्वाभिमानी व्यक्तिका रूपमा स्थान बनाएका छन् । वंशको विरासतभन्दा कर्मको पहिचानलाई प्राथमिकता दिने उनको जीवन यात्रा धेरैका लागि प्रेरणाको स्रोत बनेको छ ।

आशिष शर्मा राजनीतिमा मात्र होइन, नेपालको व्यवसायिक र वित्तीय क्षेत्रमा समेत गहिरो अनुभव राख्ने व्यक्तित्व हुन् । हाल उनी हिमालयन बैंक लिमिटेडको सञ्चालक समिति सदस्यका रूपमा कार्यरत छन् भने यसअघि नबिल बैंकमा पनि सञ्चालकको जिम्मेवारी सफलतापूर्वक निभाएका थिए । त्यस्तै, चौधरी ग्रुप (सीजी) मा जनरल म्यानेजरका रूपमा काम गर्दा उनले उत्कृष्ट व्यवस्थापकीय क्षमता प्रदर्शन गरिसकेका छन् । बैंकिङ, लगानी र आर्थिक नीतिको गहिरो बुझाइ भएको व्यक्ति राजनीतिमा आउनुलाई विकास र सुशासनका लागि सकारात्मक संकेत मानिएको छ ।

दैनिक १२ देखि १४ घण्टासम्म परिश्रम गर्ने शर्मा एक सफल उद्यमी पनि हुन् । उनले आफ्ना विभिन्न उद्यममार्फत थुप्रै युवालाई रोजगारी प्रदान गरेका छन् । ‘विदेश होइन, स्वदेशमै भविष्य’ भन्ने मूल मन्त्रलाई आत्मसात गर्दै युवाहरूलाई स्वदेशमै अवसर सिर्जना गर्नु उनको मुख्य प्राथमिकता रहेको छ ।

त्यस्तै, उनले कपिलवस्तुको कृषि क्षेत्रको सुधारमा पनि विशेष जोड दिएका छन् । परम्परागत खेती प्रणालीलाई विस्थापित गरी आधुनिक प्रविधि, वैज्ञानिक प्रणाली र बजारमुखी सोच गाउँ-गाउँसम्म पुर्‍याउन उनले महत्त्वपूर्ण भूमिका खेलेका छन् । जैविक मलको प्रयोग, अत्याधुनिक कोल्ड स्टोरेजको स्थापना र उन्नत बालीको प्रवर्द्धनमार्फत किसानको लागत घटाएर आम्दानी बढाउन सकिने उनले बताए ।

राजनीतिलाई पद प्राप्तिको माध्यम मात्र ठान्ने प्रवृत्ति विपरीत शर्माले यसलाई सेवा र त्यागको यात्राका रूपमा व्याख्या गरेका छन् । पार्टीको निर्णयले उनलाई रोक्न खोजे पनि सत्य र निष्ठाको राजनीति गर्ने व्यक्तिहरू ढिलो भए पनि स्थापित हुने उनको विश्वास छ । उनले राजनीतिमा विचारसँगै परिणाम दिने शक्ति हुनुपर्नेमा जोड दिए ।

समय सधैँ सत्यको पक्षमा रहने भन्दै कपिलवस्तुका जनताले अब विवेकपूर्ण निर्णय लिने अपेक्षा गरिएको छ । उनले आफ्नो लक्ष्य कपिलवस्तुको सर्वाङ्गीण विकास र युवामैत्री वातावरण निर्माण गर्नु रहेको बताए ।

आशिष शर्मा केवल चुनाव जित्ने होडमा मात्र छैनन्, बरु उनी कपिलवस्तुको भविष्य बदल्ने एउटा दुरगामी सोचका साथ अघि बढेका छन् । उनको अनुभव, क्षमता र जनसेवाप्रतिको समर्पणले उनलाई त्यस क्षेत्रको एक आशालाग्दो र उदयमान युवा नेताका रूपमा उभ्याएको छ ।