सानिमा रिलायन्स लाइफको सीप विकास कार्यक्रम सम्पन्न

काठमाडौँ । सानिमा रिलायन्स लाइफ इन्स्योरेन्सले कम्पनीका अभिकर्ताहरूका लागि सिप विकास कार्यक्रम सम्पन्न गरेको छ। गत जेठ ३१ र असार १ गते बर्दियाको एक रिसोर्टमा कार्यक्रम सम्पन्न गरिएको हो ।

कार्यक्रमलाई अझ प्रभावकारी र ज्ञानवर्धक बनाउन कम्पनीमा अतुलनीय योगदान दिएका अभिकर्ताहरूलाई विशेष प्राथमिकता सहितको तालिम प्रदान गर्न छिमेकी मुलुक भारतका अनुभवी प्रशिक्षक विजय कुमार झा लाई आमन्त्रित गरिएको थियो।

झा मोटिभेसनल स्पिकर र सेल्स ट्रेनरको रुपमा भारतदेखि विश्वको विभिन्न देशहरूमा प्रख्यात छन्। भारतकै ठूलो र प्रतिष्ठित जीवन बिमा कम्पनी, लाइफ इन्स्योरेन्स कर्पोरेसनमा आबद्ध झाले थुप्रै कार्यानुभव र ख्याति कमाई सकेका छन् ।

यस सीप विकास अभिवृद्धि कार्यक्रममा झाले जीवन बिमा कम्पनीको सन्दर्भमा केन्द्रित रही प्रशिक्षण प्रदान गरे । उनले जीवन बिमाको मूल उद्देश्य, ग्राहकको मनोविज्ञान, ग्राहकसँग सम्बन्ध निर्माण, आपत्ति समाधान गर्ने तरिका, तथा दीर्घकालीन सम्बन्ध विस्तारका व्यावहारिक उपायहरूबारे स्पष्ट र प्रयोगमा
ल्याउन मिल्ने सुझावहरू दिए ।

यो प्रशिक्षणले सहभागीहरूलाई आफ्ना बिक्री सीप सुधार गर्न, ग्राहकसँग अझ आत्मविश्वासका साथ प्रस्तुत हुन र कम्पनीको व्यावसायिक लक्ष्य प्राप्तिमा योगदान पुर्‍याउन प्रेरित गरेको छ।

कार्यक्रममा ८० भन्दा धेरै अभिकर्ताहरूको सहभागिता रहेको थियो। उक्त कार्यक्रममा कम्पनीका प्रमुख कार्यकारी अधिकृत शिवनाथ पाण्डे, नायव प्रमुख कार्यकारी अधिकृत निराजन कंडेल, प्रमुख व्यवसाय अधिकृतहरू, क्षेत्रीय प्रबन्धकहरू, लगायत सुदूरपश्चिम र कर्णाली प्रदेशका सबै तथा बाँके र बर्दियाको शाखा तथा उपशाखाका कर्मचारीहरूको पनि उपस्थिति रहेको थियो।

कार्यक्रममा प्रमुख कार्यकारी अधिकृतले प्रशिक्षणको महत्त्व र अपरिहार्यता माथि प्रकाश पार्दै तालिमबाट सिकेका कुराहरूलाई व्यावहारिकतामा उतार्नुपर्ने बताए । प्रस्तुत ज्ञान र सीपको उपयोग गरेर कम्पनीको व्यावसायिक लक्ष्य प्राप्तिमा दखल पुराउन सकिने बताएका थिए ।

सोही कार्यक्रममा बोल्दै नायव प्रमुख कार्यकारी अधिकृतले सीप विकास जस्ता तालिमले अभिकर्ताहरूलाई व्यवहारिक सीप र आत्मविश्वास प्रदान गर्ने भन्दै बीमालेख बिक्री दरको वृद्धि र ग्राहक सन्तुष्टिमा योगदान पुर्‍याउने र कम्पनीको दीर्घकालीन सफलता र प्रतिस्पर्धात्मक क्षमतालाई मजबुत बनाउने बताए ।