हामी कसरी जिम्मेवार बन्न सक्छौँ?

काठमाडौँ । समाजमा सकारात्मक परिवर्तन ल्याउनका लागि प्रत्येक नागरिकले जिम्मेवार भूमिका निर्वाह गर्नु अत्यन्त आवश्यक हुन्छ । तर, जिम्मेवार बन्ने कुरा केवल ठुलो भाषणमा सीमित रहनु हुँदैन, यो व्यवहार, सोच र कार्यशैलीमा देखिनुपर्छ । जिम्मेवारी भनेको केवल आफन्त वा संस्थाका लागि होइन, सम्पूर्ण समाज र राष्ट्रका लागि हो ।

हामी कसैलाई दोष थोपर्नभन्दा पहिले आफैँबाट सुरु गर्नुपर्छ । नियम पालना गर्नु, झुट नबोल्नु, सार्वजनिक सम्पत्ति नष्ट नगर्नु, कर तिर्नु, ट्राफिक नियम मान्नु यस्ता सामान्य व्यवहारबाट पनि हामी जिम्मेवार नागरिक बन्न सक्छौँ ।

जिम्मेवार बन्नका लागि सकारात्मक सोच राख्नु जरुरी हुन्छ । हाम्रो सोच परिवर्तन भयो भने व्यवहार परिवर्तन हुन्छ । अरूको सफलता देखेर ईर्ष्या होइन, प्रोत्साहन दिन सक्ने मानसिकता विकास गरौँ । छिमेकी, साथी, परिवार तथा समाजमा सहयोगी भावना बढाउँदा जिम्मेवार चरित्रको निर्माण हुन्छ ।

हामीले हरेक दिन बिताउने समय, हामीसँग भएका सीप र स्रोतको सदुपयोग गरेर पनि ठुलो परिवर्तन ल्याउन सक्छौँ । अनावश्यक विवाद, गसिप वा नकारात्मकतामा समय नष्ट नगरी, देश विकासमा योगदान हुने काममा लागौँ ।

ठुलो परिवर्तनको सुरुवात सानो कदमबाट हुन्छ । विद्यालयमा अध्ययनरत विद्यार्थी होस् वा कार्यालयमा कार्यरत कर्मचारी, सबैले आफ्नो भूमिका इमानदारीपूर्वक निर्वाह गरेमा मुलुक परिवर्तन हुन्छ । घर सफा राख्नु, फोहोर नफ्याल्नु, रुख रोप्नु जस्ता कामले पनि हाम्रो जिम्मेवारी झल्काउँछ ।

हामी प्रायः देशको समस्याका लागि नेतृत्वलाई दोष दिन्छौँ । तर, हामी नागरिकले पनि जिम्मेवार भूमिका खेल्नुपर्छ । नेतृत्व बदल्नुपर्ने हो भने त्यो पनि हामीले नै मतको माध्यमबाट गरिन्छ । त्यसैले सचेत, शिक्षित र जिम्मेवार मतदाता बन्नु जरुरी छ ।

जिम्मेवारीको भावना केवल पद वा शक्तिले मात्र आउँदैन । यो हाम्रो चरित्र, चेतना र व्यवहारसँग गाँसिएको हुन्छ । जब हामी हरेकले “म मेरो ठाउँबाट के गर्न सक्छु?” भनेर सोच्न थाल्छौँ, तब समाज र राष्ट्रमा साँच्चिकै सकारात्मक परिवर्तन आउन थाल्छ ।

समृद्ध राष्ट्र बनाउनका लागि जिम्मेवार नागरिक बनौँ ।