शिक्षकको कुटाइबाट छात्रा घाइते, राई पक्राउ

काठमाडौं । मोरङमा शिक्षकको कुटाइबाट एक छात्रा घाइते भएकी छन् ।

मोरङको श्री सिंहवाहिनी माध्यमिक विद्यालयका शिक्षक पवन राईको कुटाइबाट छात्रा घाइते भएकी हुन् ।

कक्षा १० मा अध्ययनरत १७ वर्षीया जस्ना राईलाई शिक्षकले विद्यालयमै कुटपिट गरेका हुन् ।

घाइते छात्राको पथरी अस्पतालमा उपचार भइरहेको प्रहरीले जनाएको छ । घाइते छात्राको पाखुरामाथिको पातामा चोट लागेको छ ।

इलाका प्रहरी कार्यालय पथरीका डिएसपी मोहनविक्रम दाहालका अनुसार विद्यार्थीमाथि कुटपिट गर्ने शिक्षक पवनलाई पक्राउ गरिएको छ ।

पवनले प्लास्टिकको पाइपले कुटपिट गर्दा विद्यार्थी घाइते भएको डिएसपी दाहालले जानकारी दिए ।

पक्राउ परेका शिक्षकमाथि थप अनुसन्धान भइरहेको प्रहरीले जनाएको छ ।