खेल क्षेत्रका विकृति, र विसंगतिलाई अन्त्य गर्छु : खेलकुदमन्त्री

काठमाडौं । युवा तथा खेलकुदमन्त्री तेजुलाल चौधरीले खेल क्षेत्रका विकृति, र विसंगतिलाई अन्त्य गर्ने प्रतिवद्धता जनाएका छन् ।

बिहीवार राष्ट्रिय खेलकुद परिषद्ले गरेको बधाई कार्यक्रममा बोल्दै उहाँले यस्तो प्रतिवद्धता जनाएका हुन् । उनले मन्त्रालय मातहतका निकायहरुलाई सुशासनमा ध्यान दिएर काम गर्न निर्देशन दिए ।

उनले आफ्नो एउटै चाहना राम्रो काम गर्ने भएको पनि बताए । उनले ऐन, कानूनहरुको परिपालना गरेर मात्रै खेलकुदका गतिविधि सञ्चालन गर्न आग्रह गरे ।

उनले भने– ‘तपाईंहरु सम्पूर्ण साथीहरुलाई यो विश्वास दिलाउन चाहन्छु । यो भरोसा दिलाउन चाहन्छु । हाम्रो यो कार्यकालमा तपाईंहरु ढुक्क भएर राम्रो काम गर्नुस् । यहाँका विकृति, र विसंगतिलाई अन्त्य गर्ने प्रतिवद्धता छ । सुशासनमा ध्यान दिन आग्रह गर्दछु । हाम्रो एउटै चाहना छ, काम गर्नुस्, राम्रो काम होस् । सुशासन कायम होस् । ऐन, कानूनहरुको परिपालना गर्न सक्नुभएन भने ढिलो चाँडो आफूलाई नै अफ्ठ्यारो हुन्छ । बेरुजुको चाङ छ । अस्तिमात्रै बेरुजु हेर्दा ८५ प्रतिशत थियो । कागज मिलेको छैन भने कागज मिलाइदिनुस् । साथी भाईले केही रकम तिर्नु छ भने तिर्दिनुस् । छैन भने दिल खोलेर हिँड्नुस् । यहाँका बेरुजुको विषयमा सार्वजनिक लेखा समितिमा आउँछ ।’

राष्ट्रिय खेलकुद परिषद् (राखेप) का सदस्यसचिव १९ औं एशियाली खेलकुद सकिए लगत्तै २० औं एशियाली खेलकुदको लागि मिसन २०२६ भनेर अघि बढाएको बताए ।

अहिले १० खेलको १२२ जना खेलाडी र १० वटा खेलका २० जना प्रशिक्षक रहनुभएको र विशेष प्रशिक्षणमा व्यवस्थित रुपमा अघि बढाएको जिकिर गरे ।

उनले नेपाली खेलकुदले अहिलेसम्म स्वर्ण पदक प्राप्त नगरेको भन्दै स्वर्ण पदकसहित दोहोरो अंकको पदक प्राप्त गर्ने लक्ष्य राखेर काम गरिरहेको बताए ।

उनले राखेपको मुख्य कार्यक्रम नै मिसन २०२६ भएको बताए ।