दोहोरो कानून हुँदैन, गृहमन्त्री लामिछानेमाथि लागेका आरोपको छानबिन हुनुपर्छ-राप्रपा
मकालु खबर २०८१ जेठ ९ गते
राप्रपाको केन्द्रीय कार्यसम्पादन समितिको बैठकमा केन्द्रीय कार्यसमिति बैठकमा पेश गरिने प्रतिवेदनहरुमाथि छलफल भएको छ ।
बैठकमा भोलिदेखि तीन दिनसम्म बस्ने केन्द्रीय कार्यसमिति बैठकमा पेश गरिने प्रतिवेदनहरुमाथि बृहत्त छलफल भएको प्रवक्ता मोहन श्रेष्ठले बताए।
बैठकमा अध्यक्ष राजेन्द्र लिङ्देनले समसामयिक राजनीतिक परिस्थितिको समीक्षा र भावी कार्यदिशा सम्बन्धी राजनीतिक प्रतिवेदन, महामन्त्री डा. धवलशमसेर राणाले सांगठनिक प्रतिवेदन, महामन्त्री राजेन्द्र गुरुङ्ले सचिवालय सम्बन्धि प्रतिवेदन र कोषाध्यक्ष निलकण्ठ काफ्लेले आर्थिक प्रतिवेदन पेश गरे।
प्रस्तुत प्रतिवेदनहरुलाई सामान्य परिमार्जन सहित केन्द्रीय कार्यसमितिको बैठकमा पेश गरिने उनले बताए ।
बैठकमा कान्तिपुर मिडिया ग्रुपका अध्यक्ष कैलाश सिरोहियामाथि नागरिकता दुरूपयोग सम्बन्धी अभियोगमा पक्राउ परेको विषय पनि छलफल भएको बताए।
उनले भने, ‘अब त्यो विषय न्यायिक निरुपणको विषय बनिसकेको छ । राप्रपा जुनसुकै ओहोदामा रहेका जोसुकै व्यक्तिले कानुन विपरीत गरेका कामको निष्पक्ष र न्यायिक छानबिन हुनुपर्दछ भन्नेमा प्रष्ट छ । नागरिकता प्रकरणमा जुन ढंगबाट सिरोहियामाथि छानविन सुरु भएको छ त्यसैगरी गृहमन्त्री रवि लामिछानेमाथि लागेका आरोपमाथि पनि छानविन गरिनुपर्छ भन्ने राप्रपाको धारणा रहेको छ ।’
मकालु खबर २०८१ जेठ ९ गते
प्रतिक्रिया
सम्बन्धित
