बझाङ भूकम्प : एक महिला बेपत्ता, ९ जना घाइते
मकालु खबर
काठमाडौं । बझाङमा भूकम्पसँगै आएको पहिरोमा परी एक जना महिला बेपत्ता भएकी छन् ।
जयपृथ्वी नगरपालिका वडा नम्बर–११ ओखलगाउँकी गुनदेवी धामी भूकम्पसँगै आएको पहिरोमा परी बेपत्ता भएको प्रहरीले जनाएको छ ।
उनी टिमुर टिप्न गाउँनजिकैको जंगलमा गएकी थिइन् ।
यस्तै भूकम्पका कारण जिल्लाका विभिन्न ठाउँमा गरी ९ जना घाइते भएको जिल्ला प्रहरी कार्यालयले जानकारी दिएको छ ।
प्रहरी कार्यालयका प्रवक्ता दीपेश चौधरीका अनुसार जयपृथ्वी नगरपालिकामा ४ जना, मष्टा गाउँपालिकामा २ जना र केदारस्युँ, खप्तडछान्ना र वित्थडचिर गाउँपालिकामा एक–एक जना गरी ९ जना घाइते भएका हुन् ।
यस्तै भूकम्पपछि गएको सुख्खा पहिरोका कारण अवरुद्ध जयपृथ्वी राजमार्ग अझै खुल्न सकेको छैन ।
जयपृथ्वी नगरपालिकाको माल्लालाग्ना भिरमा र छबीस पाथिभेरा गाउँपालिकाको जालेबगरमा पहिरो गएका कारण राजमार्ग अवरुद्ध भएको हो ।
निरन्तर परकम्प गइरहेकोले राजमार्ग खुलाउन नसकिएको प्रमुख जिल्ला अधिकारी नारायण पाण्डेले बताएका छन् ।
मकालु खबर
