जित्नैपर्ने दबाबकाबीच अमेरिकाको सामना गर्दै नेपाल

काठमाडौँ । आइसीसी क्रिकेट विश्वकप क्वालिफायर अन्तर्गत आफ्नो दोस्रो खेलमा नेपालले अमेरिकाको सामना गर्दै छ । खेल नेपाली समय अनुसार अपराह्न १२: ४५ बजेदेखि सुरु हुँदैछ ।

प्रतियोगिताको पहिलो खेलमा नेपाल आयोजक जिम्बाबेसँग पराजित भएको थियो । जिम्बाबेले नेपाललाई ८ विकेटले पराजित गरेको थियो । त्यस्तै अमेरिकाले पनि आफ्नो पहिलो खेलमा वेस्टइण्डिजसँग हार बेहोरेको छ । पहिलो खेलमा हार बेहोरेका नेपाल र अमेरिका जित्नै पर्ने दबाबसहित आज मैदानमा उत्रिँदै छन् ।

नेपाल र अमेरिकाबीच हालसम्म ६ एकदिवसीय खेल भएका छन् । नेपाल र अमेरिकाबीच सबै ६ खेल आइसिसी विश्वकप लिग २ मा भएका थिए । जसमा नेपाल ३ खेल जितेकोछ भने २ खेलमा हार बेहोरेको छ । त्यस्तै एक खेल टाई भएको छ । नेपालले आफ्नो तेस्रो खेल असार ७ मा वेस्टइन्डिजसँग र समूह चरणको अन्तिम खेल असार ९ मा नेदरल्यान्ड्ससँग खेल्ने तालिका रहेको छ ।

विश्वकप क्वालिफायर खेल्ने १० देशलाई दुई समूहमा विभाजन गरिएको छ । जसमा समूह ए मा नेपाल, वेस्टइन्डिज, जिम्बावे, अमेरिका र नेदरल्यान्ड्स रहेका छन् भने समूह बी मा आयरल्यान्ड, श्रीलंका, युएई, स्कटल्यान्ड र ओमान रहेका छन् ।

दुवै समूहका शीर्ष तीन टोली सुपर सिक्समा स्थान बनाउने छन् । सुपर सिक्समा अर्का समूहबाट आउने तीन टोलीसँग प्रतिस्पर्धा गर्नेछन् । सुपर सिक्समा समूह चरणको अंक पनि गणना हुने भएकाले आफ्नो समूहका टोलीसँग खेल्नु पर्दैन । अन्त्यमा शीर्ष दुई टोलीले विश्वकपमा स्थान बनाउनेछन् ।  प्रतियोगिता असार ३ देखि २४ सम्म जिम्बावेमा हुनेछ ।

नेपाली टिम: रोहित पौडेल (कप्तान) कुशल भुर्तेल, आसिफ शेख, ज्ञानेन्द्र मल्ल, कुशल मल्ल, आरिफ शेख, दीपेन्द्रसिंह ऐरी, गुल्शन झा, सोमपाल कामी, करण केसी, सन्दीप लामिछाने, भीम सार्की, प्रतिश जिसी, ललित राजवंशी, अर्जुन साउद र किशोर महतो ।