नेपालको सानदार सुरुवात, यूएईले गुमायो ४ विकेट
काठमाडौँ । नेपालले आइसिसी विश्वकप लिग–२ त्रिकोणात्मक ओडिआई सिरिजमा युएईविरुद्ध सुरुवातमै चार विकेटको सफलता हात पारेको छ ।
जितको लागि २ सय ४९ रनको लक्ष्य पछ्याएको युएईले ७ ओभरमा ४ विकेट गुमाउँदै १३ रन बनाएको छ ।
स्पिनर ललित नारायण राजवंशीले पहिलो ओभरको पाँचौँ बलमा वृत्य अरविन्दलाई बोल्ड गर्दै पेभेलिएन फर्काएका थिए। यसअघि मध्य क्रममा खेल्ने वृत्यलाई युएईले आज ओपनिङ गराएको थियो ।
त्यस्तै वृत्य सुरुवातमै आउट भए । तेस्रो ओभरको चौथो बलमा आर्यन लाक्रालाई शून्यमा दीपेन्द्रसिंह ऐरीले बोल्ड आउट गरे । पछिल्ला दुई खेलमा अर्धशतक प्रहार गरेका आर्यन पनि शून्यमै पेभेलिएन फर्के ।
मोहम्मद वासिम ललितको पाँचौं ओभरको चौथो बलमा कुशल भुर्तेलबाट एक रनमा क्याच आउट भए । भने, सोमपाल कामीले आसिफ खानलाई ६ रनमा विकेटकिपर आसिफ शेखबाट क्याच आउट गराए ।
त्यसअघि टियु क्रिकेट मैदानमा टस जितेर पहिला ब्याटिङ रोजेको नेपाल ४९.२ ओभरमा २ सय ४८ रनमा अल आउट भएको थियो । नेपालका कप्तान रोहित पौडेलले १ सय १२ बलमा ९ चौकासहित सर्वाधिक ७७ रनको योगदान दिएका थिए ।