मुग्लिन-नारायणगढमा यात्रुको बिचल्ली, खाना-पानीको समस्या परे प्रहरीलाई खबर गर्न आग्रह
मकालु खबर
काठमाडौँ । नारायणगढ-मुग्लिङ सडक खण्डमा फेरी पहिरो जाँदा सयौँ सवारी रोकिएका छन् । भरतपुर महानगरपालिका-२९ मौरीखोला पुलमा मंगलबार राति पुनः पहिरो खसेपछि पूर्व पश्चिमतर्फ लागेका सयौँ सवारी रोकिएका हुन् ।
बारम्बार पहिरो खसेर सडक अवरुद्ध हुँदा गाडी चालक, सहचालक र यात्रुको बिचल्ली भएको छ । सोमबार रातिदेखि बन्द भएको सडक गएराति साढे १० बजेतिर बल्ल खुलेको थियो । तर, खुलेको चार घण्टामा फेरि पहिरो खसेपछि सडक अवरुद्ध भएको हो ।
पहिरो पन्छाउने काम जारी रहेकाले केही एक–दुई घण्टामै बाटो खुल्ने जिल्ला प्रहरी कार्यालय चितवनका डीएसपी एवं प्रवक्ता नरहरि अधिकारीले जानकारी दिए । उनले पानी र खानेकुरा नपाए तत्काल प्रहरीमा खबर गर्न आग्रहसमेत गरेका छन् ।
पहिरो खुलाउन समय लाग्ने भन्दै उनले कुनै समस्या परे तत्काल प्रहरीको १०० नम्बर वा ट्राफिक पहरीको १०३ अथवा जिल्ला प्रहरी कार्यालय चितवनमा खबर गर्न आग्रह गरे । प्रहरीले सवारी चालकहरुलाई पनि होटल र वस्ती भएका स्थानमा मात्र गाडी रोक्न र बाटो खुलेपछि मात्रै आलोपालो गन्तव्यमा जान आग्रह गरेको छ ।
मकालु खबर
