हुम्लामा हेलिकोप्टरमार्फत् मतपेटिका सङ्कलन

काठमाडौँ । नाम्खा गाउँपालिका–६ स्थित मतदानस्थलका मतपेटिका आज नेपाली सेनाको हेलिकोप्टरमार्फत याल्वाङ्गस्थित मतगणनास्थलमा ल्याइएको छ।

उक्त वडाको लिमीस्थित भृकुटी प्रावि जाङ्ग, सुनखानी प्रावि हल्जी र तिल गरी तीन स्थानका मतपेटिका हेलिकोप्टरमार्फत नाम्खाको याल्वाङ्गको निर्वाचन केन्द्र ल्याइएको हो।

न्यालु लेकमा हिमपातको कारण ती मतदानस्थलबाट मतपेटिका सङ्कलन गर्न सकिएको थिएन। ती तीन स्थानका मतपेटिका आज नेपाली सेनाको हेलीकप्टरमार्फत नाम्खाको याल्वाङ्गको निर्वाचन केन्द्रमा ल्याइएको मुख्य निर्वाचन अधिकृत जगतबहादुर पौडेलले जानकारी दिए। उनका अनुसार संकलित मतपेटिकाको मतगणनाकार्य आजै बेलुकासम्म सुरु गरिनेछ।

यसैबीच, हुम्लाको दक्षिण भेगमा पर्ने खार्पुङनाथ गाउँपालिकाको अध्यक्षमा गठबन्धनका तर्फको उम्मेदवार नेपाली कांग्रेसका कर्णबहादुर रावल एक हजार ८१० मत प्राप्त गरी विजयी भएका छन्। उनका प्रतिद्वन्द्वी नेकपा (एमाले)का प्रकाशबहादुर शाहीले १ हजार १८५ मत प्राप्त गरेका छन्।

त्यस्तै, उपाध्यक्षमा गठबन्धनकै तर्फबाट नेकपा (माओवादी)का ज्ञानबहादुर सिंह एक हजार ८७१ मतले विजयी भएका छन् भने उनका प्रतिस्पर्धी नेकपा (एकीकृत समाजवादी)का शक्तिसिंह ऐडीले ८५० मत ल्याएका हुन्।

प्रतिक्रिया

Leave a Reply

Your email address will not be published. Required fields are marked *