मिक्लाजुङको बर्खेमा शंकास्पद वस्तु भेटियाे
मकालु खबर
विराटनगर । मोरङको मिक्लाजुङ गाउँपालिकाको एक मतदान केन्द्रमा शंकास्पद वस्तु फेला परेको छ। मिक्लाजुङ गाउँपालिका वडा नम्बर १ बर्खेमा शंकास्पद वस्तु फेला परेको प्रहरीले जनाएको छ ।
मिक्लाजुङ–१ को सरस्वती आधारभूत विद्यालयको प्राङ्गणमा प्लास्टिकले बेरेर राखिएको प्रेसर कुकर फेला परेपछि नेपाली सेनाको टोली घटनास्थलमा पुगेको छ । विद्यालयबाट करिब ५० मिटर दूरीको सडकमा खतरा लेखेको प्रेसर कुकर फेला परेको जिल्ला प्रहरी कार्यालय मोरङका एसपी शान्तिराज कोइरालाले जानकारी दिए ।
तारहरू बाहिर निकालेर सडकमा छाडिएको अवस्थामा प्रेसर कुकर भेटिएको उनले बताए । घटनास्थलमा नेपाली सेनाको टोली पुगेको छ, नेपाल प्रहरीले टोली बाटोमै रहेको उनले बताए।
कुकर भेटिएको सडकमा दुई वटा बाँस पनि तेर्साइएको छ । शंकास्पद वस्तु भेटिएपछि नेपाली सेनाको बम डिस्पोजल टोलीलाई खबर गरिएको थियो । घटनास्थल उर्लाबारीबाट ३२ किलोमिटर उत्तरमा पर्छ ।
दुर्गम भएको कारण त्यहाँ पुग्न समय लागेको प्रहरीले जनाएको छ । गएराती पनि सो क्षेत्रमा विस्फोट भएको स्थानीयले बताएका छन् । शंकास्पद वस्तु भेटिएको गाउँमा करिब दुई वर्षअघि शिक्षक राजेन्द्र श्रेष्ठको हत्या भएको थियाे ।
मकालु खबर
