गोरखा नगरपालिकामा एकीकृत समाजवादीले कांग्रेसलाई सघाउने, उम्मेदवारी फिर्ता
पोखरा । गोरखा नगरपालिकामा नेकपा एकिकृत समाजवादीले नेपाली कांग्रेसलाई सघाउने भएको छ ।
कांग्रेस सभापति चन्दनबाबु खत्री र एकीकृत समाजवादीका अध्यक्ष सीताराम बुढाथोकीले संयुक्त विज्ञप्ती जारी गरी दुई पार्टी मिलेर चुनावमा जाने निर्णय गरेका हुन् ।
निर्णयसँगै एकीकृत समाजवादीका उम्मेदवारले नगरपालिकामा दिएको प्रमुख र उपप्रमुखको उम्मेदवार फिर्ता बोलाएको छ । नगरपालिकाका १४ वटै वडामा तालमेललाई बलियो बनाउने सहमति पनि भएको छ ।
एकीकृत समाजवादीबाट नगर प्रमुखमा सानुमाया बस्नेत, उपप्रमुखमा यादब बस्नेतले उम्मेदवारी दिएका थिए ।
उनीहरू दुवैजनाले अब कांग्रेसका उम्मेदवारलाई सघाउने निर्णय एकीकृत समाजवादीले गरेको छ ।
गोरखाको मेयरमा कांग्रेसबाट राजनराज पन्त र उपमेयरमा मसलीमाया थोकर (सपना पुन) उम्मेदवार छन् । यहाँ माओवादी र जसपा मिलेर अर्को गठबन्धन बनेको छ भने एमालेले पनि आफ्नै उम्मेदवार उठाएको छ ।
