स्याङ्जामा एमाले-कांग्रेस कार्यकर्ता खुकुरी हानाहान

पोखरा । स्याङ्जाको चापाकोटमा एमाले र काँग्रेस कार्यकर्ताबीच खुकुरी हानाहान भएको छ । चापाकोट १० मा भएको झडपमा परि एमालेका एक कार्यकर्ता घाइते भएका छन् ।

एमालेको चुनावी कार्यक्रम सकेर घरतर्फ फर्कँदै गर्दा झडप भएको प्रहरीले जनाएको छ । स्थानीय सुन्तलीटारमा घटना भएको हो । खुकुरी प्रहारबाट एमाले कार्यकर्ता नारायण मगर घाइते भएका हुन् । उनको थप उपचारका लागि पोखरा पठाइएको छ ।

घटनामा संलग्नको पहिचान भैसकेको र उनीहरूको खोजी भइरहेको प्रहरीले जनाएको छ । ‘घटना कसले घटायो भन्ने थाहा भैसकेको छ । उनीहरू फरार छन्,’ डीएसपी रवीन्द्र खनालले भने, ‘खोजी भइरहेको छ ।’

घटनामा संलग्न २ जना रहेको बताइएको छ । प्रारम्भिक अनुसन्धानका आधारमा राजनीतिक कारणले नै झडप भएको अनुमान छ ।