विराटनगरमा गठबन्धन दलको मेयरको बागी फिर्ता, उपमेयरको भएन

विराटनगर । सत्ता गठबन्धन भित्रैबाट बागी परेकोमा मेयरको उम्मेदवारी फिर्ता भएपनि उपमेयरको उम्मेदवारी भने फिर्ता भएन ।

विराटनगरमा गठबन्धन दलहरूले महिलालाई ठाउँ नदिएको भन्दै उपमेयरमा माओवादीकी नमिता न्यौपानेले मनोनयन दर्ता गरेकी थिइन् । मनोनयन दर्ता फिर्ता लिने समयसम्म विराटनगर महानगरपालिकामा २३ जनाले उम्मेदवारी फिर्ता लिएका छन् । गठबन्धन गरेको जनमोर्चा सहित परिवार दलले पनि उम्मेदवारी फिर्ता लिएको छ । उम्मेदवारी फिर्ता लिनेमा राष्ट्रिय जनमोर्चाका टंग प्रसाद गौतम रहेका छन् । राष्ट्रिय जनमोर्चाले सरकार सम्बद्ध दलहरूको बिचमा गठबन्धन गरेको थियो ।

त्यस्तै, नेकपा एमालेसँग गठबन्धन गरेको परिवार दलले पनि आफ्नो उम्मेदवारी फिर्ता लिएको छ। मेयरका उम्मेदवार महेश निरौला र उपमेयर दिपा पोखरेलले मुख्य निर्वाचन अधिकृतको कार्यालयबाट उम्मेदवारी फिर्ता लिएको मुख्य निर्वाचन अधिकृतको कार्यालयका सूचना अधिकार हेमबहादुर बुढाथोकीले जानकारी दिए ।

त्यस्तै, गठबन्धन उल्लङ्घन गर्दै नेकपा माओवादीकी नेतृ केमुना ओडारीले मेयरमा उम्मेदवारी दिएकी थिइन् । उनले पनि आफ्नो उम्मेदवारी फिर्ता लिएकी छिन् । उपप्रमुखमा उम्मेदवारी दिएका उद्धव कोइरालाले स्वतन्त्र रूपमा दिएको उम्मेदवारी फिर्ता लिएका छन् । उनी नेपाली काँग्रेस निकटका हुन् ।

उता वडा अध्यक्षमा ८ जनाले उम्मेदवारी फिर्ता लिएका छन् । गठबन्धनबाट विरोध जनाएका र असन्तुष्टहरूले बागी उम्मेदवारी दर्ता गराएका थिए । उम्मेदवारी फिर्ता लिनेहरूमा विराटनगर १ बाट रामु कामत , १२ वडाबाट मञ्जु साह सुँडी, वडा नम्बर ८ बाट मोहम्मद सद्दाम हुसेन, वडा नम्बर १० बाट परिवार दलका अमित सुवेदी, वडा नम्बर २ बाट दिलाशा पोखरेलले उम्मेदवारी फिर्ता लिएका हुन् । वडा नम्बर ५ का गणेशप्रसाद दंंगाल, शुभम् निरौला र वडा नम्बर ३ बाट माओवादीबाट वडा अध्यक्षमा उम्मेदवारी दिएका कृष्णप्रसाद निरौलाले पनि उम्मेदवारी फिर्ता लिएको मुख्य निर्वाचन अधिकृतको कार्यालयले जनाएको छ ।

त्यस्तै सदस्यहरूमा कृष्ण दाहाल, शिपालाल यादव, किरण मेहता, अमरलाल दाश तत्मा, जनमत पार्टीका नारायण कामत, नेकपा एसकी मिना कुँवर, नारायण यादव, मोहनप्रसाद साह, नेकपा एसकी निर्मला राम र नेकपा एसकै मोहम्मद सलिम मियाँले पनि उम्मेदवारी फिर्ता लिएका हुन् ।

उपमेयरमा माओवादीले उम्मेदवारी फिर्ता लिएन
केन्द्रको दबाबको बाबजुद पनि विराटनगर महानगरपालिकाको उपप्रमुखमा माओवादी केन्द्रकी महानगरपालिका सचिव नमिता न्यौपानेले उम्मेदवारी दर्ता फिर्ता लिइनन् । उनले आफ्नो उम्मेदवारी पार्टीको तर्फबाट नभई स्वतन्त्र रहेको बताइन् ।

माओवादीकै तर्फबाट ओडारीले मेयरमा दर्ता गराएको उम्मेदवारी फिर्ता लिइरहँदा उपमेयरको उम्मेदवारी भने फिर्ता भएको छैन । पार्टीले उम्मेदवार बनाउन महिला समावेशीताको कुरालाई ध्यान नदिएको भन्दै आफूले स्वतन्त्र उम्मेदवारी दिएको बताइन् ।

‘पार्टीबाट उम्मेदवारी फिर्ता गराउनको लागि चर्को विरोध आइरहेको आएको थियो, उनले भनिन्, मैले पहिला नै पार्टीलाई राजीनामा दिइसकेकोले महिलाको मुद्दा स्थापित गराउन उम्मेदवारी फिर्ता लिन सकिन ।’