शुरू भयो टाइफाइड विरुद्धको खोप अभियान (तस्वीरसहित)
काठमाडाैँ । सरकारले आजदेखि वैशाख १८ गतेसम्म १५ महिनादेखि १५ वर्ष सम्मका बालबालिकाहरूलाइ टाइफाइडविरुद्धको खोप अभियान शुरू गरेको छ ।
राष्ट्रिय खोप कार्यक्रम अन्तर्गत पहिलो पटक बालबालिकालाई अनुदान सहयोगमा प्राप्त भएको टाइफाइडविरुद्धको खोप लगाउन लागिएको हो ।
युनिसेफ, गाभी खोप सञ्जाल, विश्व स्वास्थ्य सङ्गठन र अन्य साझेदारहरू मुलुक र संस्थाको सहयोगमा टाइफाइडविरुद्धको खोप अभियान सञ्चालन गरिएको हो ।
टाइफाइडविरुद्धको खोपका निम्ति गाभीको सहयोग प्राप्त गर्ने राष्ट्रमध्ये नेपाल चौथो हो । यसअघि पाकिस्तान, लाइबेरिया र जिम्बावेले गाभी र यसका साझेदार संस्थाहरूको सहयोग प्राप्त गरेका थिए ।
सरकारले ७५ लाख बालबालिकामध्ये कम्तीमा ९५ प्रतिशतलाई टाइफाइड विरुद्धको खोप लगाउने लक्ष्य राखेको छ । यसका लागि ७५३ वटै स्थानीय तहमार्फत विद्यालयमै गएर बालबालिकालाई खोप लगाउने व्यवस्था गरिएको छ । विद्यालय नजाने उमेर समूहका बालबालिकाको हकमा भने स्थानीय स्वास्थ्य संस्थामा खोप कार्यक्रम सञ्चालन गरिने छ ।
