सिंहदरबारभित्र सेनाको पाँच तले भवन बन्दै, मन्त्री झाँक्रीद्वारा शिलान्यास
काठमाडौँ । सिंहदरबारस्थित चण्डीदल गणको ५ तले भवन निर्माण हुने भएको छ । उक्त भवनको सहरी विकास मन्त्री रामकुमारी झाँक्रीले सोमबार शिलान्यास गरेकी हुन् । सहरी विकास तथा भवन निर्माण विभागको आयोजनामा निर्माण हुने उक्त भवन २२ महिनाभित्र सम्पन्न गर्ने लक्ष्य रहेको विभागले जनाएको छ ।
कूल ३६८ बेड क्षमताको उक्त भवन ६५ करोड ९५ लाख ४९ हजार ९६४ रुपैयाँ लागत अनुमान गरिएको छ । तुण्डी रसुवा बिकोई जेभीले निर्माण गरिरहेको भवन १ लाख वर्ग फिटमा निर्माण हुँदैछ । कूल ७०२ जना सैनिक अट्ने भवनमा १९२ जनाले एकै पटक खाना खान सक्ने किचन समेत निर्माण हुनेछ ।
भवनभित्र सैलुन, लुगा धुने ठाउँ, वर्कसप, ४ वटा ब्याडमिन्टन कोर्ट र एक बास्केटबल कोर्ट समेत निर्माण गरिने विभागले जनाएको छ । भवनको शिलान्यास गर्दै मन्त्री झाँक्रीले समयमै आयोजना सम्पन्न गर्न निर्माण कम्पनीलाई निर्देशन दिइन् ।
मन्त्रालयको तर्फबाट सेनाको लागि उक्त भवन निर्माण गर्ने अवसर पाएकोमा खुसी व्यक्त गर्दै मन्त्री झाँक्रीले ताेकिएकाे समयमै हस्तान्तरण गर्न समेत आतुर रहेको बताइन् । यस्तै भवन निर्माण कम्पनीका प्रतिनिधि सुमन सुवेदीले आफूहरू समयमै निर्माण सम्पन्न गर्न प्रतिबद्ध रहेको बताए ।
यस्तै रक्षा मन्त्रालयका सचिव किरणराज शर्माले सिंहदरबारभित्र गुणस्तरीय सैनिक भवन निर्माण हुनु सुखद विषय भएको बताए । उनले सेना विकास र शान्तिको अमूल्य सूचक भहेको भन्दै सेनालाई स्रोत साधन सम्पन्न बनाउन मन्त्री झाँक्रीको पहल सराहनीय रहेकाे बताए ।
कार्यक्रममा राष्ट्रिय योजना आयोगका उपाध्यक्ष विश्व पौडेल, शहरी विकास सचिव मणिराम गेलाल, शहरी विकास तथा भवन निर्माण विभागका महानिर्देशक पद्म कुमार मैनाली, रक्षा सचिव किरणराज शर्मा लगायतकाे उपस्थिति थियो ।
