पोखराको ल्यान्डफिल साईट सार्ने महानगरको निर्णयविरुद्ध संघर्ष समिति
मकालु खबर
पोखरा । पोखरामा अन्तरराष्ट्रिय विमानस्थल निर्माणाधीन छ । केहि महिनाभित्रै अब यहाँबाट अन्तरराष्ट्रिय उडान हुनेछ । तर उडानअघि हालको ल्यान्डफिल साईट हटाउनुपर्ने पहिलो शर्त छ । विमानस्थल आयोजनाको पटक पटकको ताकेतापछि पोखराले बल्ल जग्गा पहिचान गरेको छ ।
अझै जग्गा महानगरको नाममा आइसकेको छैन । पोखरा १६ र २० को सीमाना पस्मराङमा जग्गा खोजेर त्यहाँ ल्यान्डफिल सार्ने महानगर कार्यपालिका बैठकले निर्णय गरिसकेको छ । जग्गा खोज्न वडा नम्बर १६ का अध्यक्ष जीवन आचार्यको संयोजकत्वमा ११ का अध्यक्ष मोहन बास्तोला र प्राविधिक सम्मिलित अध्ययन समिति गठन भएको थियो ।
सोही समितिले ३ वटा जग्गा उपयुक्त भनी सिफारिस गरेकोमा कार्यपालिकाले पस्मराङलाई छनोट गरेको हो । तर वडा नम्बर २० का स्थानीयले भने आफूहरूलाई बिनाजानकारी ल्यान्डफिल सार्न लागिएको भन्दै अवरोध गरेका छन् । वडाध्यक्ष सीम गुरुङको संयोजकत्वमा संघर्ष समिति नै गठन गरेर आन्दोलन थालेका हुन् ।
आन्दोलनको प्रारम्भिक चरणअन्तर्गत महानगरलाई बुधबार ज्ञापनपत्र बुझाएका छन् । स्थानीयहरूले र्यालीसहित महानगरमा आएर कुनै हालतमा त्यहाँ ल्यान्डफिल सार्न नदिने बताएका छन् ।
संघर्ष समितिका संयोजक गुरुङले महानगरका प्रमुख प्रशासकीय अधिकृत महेश बराललाई ज्ञापनपत्र बुझाए । आफूहरू विकासविरोधी नभएको र अन्तरराष्ट्रिय उडानअघि ल्यान्डफिल सानुपर्ने अवस्थाबारे जानकारी भएपनि अहिले तोकेको जग्गा उपयुक्त नहुने उनले बताए ।
‘विकासविरुद्ध हामी छैनौँ । ल्यान्डफिल सार्नैपर्ने पनि छ । तर उपयुक्त ठाउँ हुनुपर्यो नि !’ उनले भने, ‘हामीलाई जानकारी नै नदिई हाम्रो वडाको जग्गा उपयुक्त भनी सिफारिस गरेको घटनाले हाम्रो ध्यानाकर्षण भएको छ ।’ उनले निर्णय फिर्ता लिन माग गरेका छन् ।
‘स्थानीयको मागलाई बेवास्ता गरी ल्यान्डफिल सार्ने गतिविधि अघि बढाए चरणबद्ध रुपमा संघर्षका कार्यक्रम गर्ने चेतावनी दिन चाहान्छौँ,’ ज्ञापनपत्रमा भनिएको छ, ‘आन्दोलनबाट सिर्जना हुने परिस्थितिको महानगर नै जिम्मेवार हुनेछ ।’
मकालु खबर
