नेपालको आर्थिक वृद्धि ३.९ प्रतिशत हुने विश्व बैंकको प्रक्षेपण
काठमाडौँ । नेपालको आर्थिक वृद्धिदर चालु आर्थिक वर्षमा ३.९ प्रतिशतले हुने विश्व बैंकले प्रक्षेपण गरेको छ ।
कोरोनाविरुद्धको खोपका कारण आर्थिक गतिविधि चलायनमान हुँदा अर्थतन्त्र सुधारउन्मुख रहेको विश्व बैंकले जनाएको छ ।
खोप अभियान बढेका कारण नेपालको पर्यटन क्षेत्रमा सुधार हुने, वैदेशिक रोजगारीमा जानेहरुको संख्या बढ्नेलगायतका कारणले अर्थतन्त्रको वृद्धिमा सुधार हुने पक्षेपण विश्व बैंकको छ ।
त्यस्तै गत आर्थिक वर्षमा नेपालको आर्थिक वृद्धि दर १.८ प्रतिशत रहेको विश्व बैंकको अनुमान छ ।
चालु आर्थिक वर्षमा भने नेपालसँगै दक्षिण एसियाली देशहरुमा अर्थतन्त्रको पुनरुत्थान सुरु भएको बैंकले जनाएको छ । दक्षिण एसियाका कतिपय देशको अर्थतन्त्र कोरोना महामारी सुरु हुनुभन्दा अघिकै अवस्थामा पुगिसकेको समेत विश्व बैंकले जनाएको छ ।
दक्षिण एसियाली क्षेत्रमा ७ प्रतिशतभन्दा माथिको आर्थिक वृद्धि हुने बैंकले प्रक्षेपण गरेको छ ।
कोरोनापछि आर्थिक क्षेत्रको सुधारका लागि नयाँ प्रयास भइरहेको बैंकले जनाएको छ ।