बढ्याे आयात–निर्यात, व्यापार घाटा ७० प्रतिशतले वृद्धि
काठमाडौँ । चालु आर्थिक वर्षको पहिलो महिना(साउन)मा कुल वस्तु निर्यातमा उच्च वृद्धि देखिएको छ । राष्ट्र बैंकले जारी गरेकाे साउन महिनाकाे तथ्याङ्कमा आधारित देशकाे वर्तमान आर्थिक तथा वित्तीय स्थिति प्रतिवेदनले उक्त महिनामा ११५.९ प्रतिशतले बढेर २० अर्ब ७६ करोड रुपैयाँका वस्तु निर्यात भएका छन् । अघिल्लो वर्षको सोही अवधिमा यस्तो निर्यात ८.९ प्रतिशतले बढेको थियो ।
प्रतिवेदन अनुसार चालु वर्षको साउनमा भारततर्फको निर्यात १६७ प्रतिशत, चीनतर्फको निर्यात ४७.८ प्रतिशत र अन्य मुलुकतर्फकाे निर्यात १७.५ प्रतिशतले बढेको छ ।
उक्त अवधिमा सोयाविन तेल, पाम तेल, धागो (पोलिष्टर तथा अन्य), जुस, पिना लगायतका वस्तुको निर्यात बढेको छ । तर, अलैँची, आयुर्वेदिक औषधी, जडिबुटी, तार, तयारी छालाका समान लगायतका वस्तुको निर्यात घटेको छ ।
त्यस्तै चालु वर्षको साउनमा कुल वस्तु आयात ७५.७ प्रतिशतले बढेर १ खर्ब ५० अर्ब ७३ करोड पुगेको छ । अघिल्लो वर्षको सोही अवधिमा यस्तो आयात १९.६ प्रतिशतले घटेको थियो ।
भारतबाट हुने आयात ५८.७ प्रतिशत, चीनबाट हुने आयात ८७.६ प्रतिशतले र अन्य मुलुकबाट हुने आयात १२०.८ प्रतिशतले बढेको छ ।
पेट्रोलियम पदार्थ, यातायातका साधन तथा पार्टपुर्जा, कच्चा सोयाविन तेल, एमएस बिलेट, सुन लगायतका वस्तुको आयात बढेको । रसायनिक मल, सिमेन्ट, सुर्ती, हवाईजहाजका पार्टपुर्जा, तयारी पोषाक लगायतका वस्तुको आयात घटेको छ ।
समीक्षा अवधिमा कञ्चनपुर, मेची र नेपालगञ्ज भन्सार कार्यालयबाहेकका नाकाबाट गरिएको निर्यात बढेको छ । त्यसैगरी, कैलाली भन्सार कार्यालयबाहेकका नाकाबाट भएको आयात बढेको छ ।
व्यापार घाटा ७० प्रतिशतले बढ्यो
चालु वर्षको पहिलो महिनामा कुल वस्तु व्यापार घाटा ७०.६ प्रतिशतले बढेर १ खर्ब २९ अर्ब ९७ करोड पुगेको छ । अघिल्लो वर्षको सोही अवधिमा यस्तो घाटा २२.२ प्रतिशतले घटेको थियो । समीक्षा अवधिमा निर्यात–आयात अनुपात १३.८ प्रतिशत पुगेको छ । अघिल्लो वर्षको सोही अवधिमा यस्तो अनुपात ११.२ प्रतिशत रहेको थियो ।
समीक्षा अवधिमा भारतबाट अमेरिकी डलर भुक्तानी गरी रु. १८ अर्ब ८६ करोड बराबरको वस्तु आयात भएको छ । अघिल्लो वर्षको सोही अवधिमा रु.९ अर्ब २६ करोड बराबरको यस्तो आयात भएको थियो ।