दीप श्रेष्ठलाई सङ्गीतकार संघद्वारा २ लाख सहयोग
काठमाडौँ । गायक दीप श्रेष्ठलाई सङ्गीतकार संघले नगद २ लाख सहयोग गर्ने भएको छ । लामो कोरोना संक्रमणपछि उनी केही दिनअघि मात्रै घर फर्किएका छन् । श्रेष्ठलाई संघले उक्त सहयोग गर्ने निर्णय गरेको संघका अध्यक्ष पारस मुकारुङले सामाजिक सञ्जालमार्फत बताएका छन् ।
श्रेष्ठलाई संघले उक्त रकम सङ्गीतकर्मी कल्याणकारी कोषबाट दिने निर्णय गरेको हो । दीप श्रेष्ठको नाममा काटिएको चेकको फोटो राख्दै अध्यक्ष मुकारुङले लेखेका छन्‚ ‘नेपाली सङ्गीतका एक हस्ति‚ वरिष्ठ गायक तथा सङ्गीतकार दीप श्रेष्ठज्यू कोभिड-१९ लाई जितेर हस्पिटलदेखि डिस्चार्ज हुनुभएको छ । उहाँको शीघ्र स्वस्थलाभको कामना गर्दै सङ्गीतकर्मी कल्याणकारी कोषबाट सङ्गीतकार सङ्घले आर्थिक सहयोग गर्ने निर्णय गरेको छ ।’
मुकारुङले श्रेष्ठको स्वास्थ्य लाभको कामना गर्दै सङ्गीतकार सङ्घलाई सहयोगका लागि धन्यवाद समेत दिएका छन् ।